ബംഗളൂരൂ: ബജ്റംഗ്ദൾ പ്രവർത്തകൻ ഹർഷയുടെ കൊലപാതകവുമായി ബന്ധപ്പെട്ട് ‘മംഗലാപുരം മുസ്ലീം’ എന്ന ഫേസ്ബുക്ക് പേജിനെതിരെ അപകീർത്തികരമായ ഉള്ളടക്കം പോസ്റ്റ് ചെയ്തതിന് എഫ്ഐആർ രജിസ്റ്റർ ചെയ്തു. ഹർഷയെ ക്രൂരമായി വെട്ടിക്കൊലപ്പെടുത്തിയതിന് ശേഷം തിങ്കളാഴ്ച ‘മംഗലാപുരം മുസ്ലീങ്ങൾ’ മരിച്ചയാൾക്കെതിരെ അധിക്ഷേപകരമായ പദങ്ങൾ ഉപയോഗിച്ച് അപകീർത്തികരമായ ഒരു പോസ്റ്റ് അപ്ലോഡ് ചെയ്തിരുന്നു.
ശിവമോഗ കൊലപാതകത്തിന്റെ പശ്ചാത്തലത്തിൽ വർഗീയ വിദ്വേഷവും അക്രമവും വളർത്തിയതിന് ഫേസ്ബുക്ക് പേജിന്റെ അഡ്മിനുകൾക്കെതിരെ സൈബർ, ഇക്കണോമിക് ആൻഡ് നാർക്കോട്ടിക് ഒഫൻസ് പോലീസ് സ്റ്റേഷൻ സ്വമേധയാ കേസെടുത്തിരുന്നു. സോഷ്യൽ മീഡിയ വിഭാഗത്തിലെ ഹെഡ് കോൺസ്റ്റബിൾ രാജ എം നൽകിയ പരാതിയുടെ അടിസ്ഥാനത്തിലാണ് കേസെടുത്തിരിക്കുന്നത്.
ഹർഷയുടെ 2015ലെ ഒരു പഴയ പോസ്റ്റിനെ പരാമർശിച്ച്, മുഹമ്മദ് നബിയെ അധിക്ഷേപിച്ചുവെന്ന് പേജ് ആരോപിച്ചു. പ്രവാചകനെ അധിക്ഷേപിക്കുന്നവനും ‘അതേ വിധി നേരിടേണ്ടിവരുമെന്ന്’ മുന്നറിയിപ്പ് നൽകി. കേസിൽ മംഗലാപുരം മുസ്ലീമിനെതിരെ എഫ്ഐആർ ഫയൽ ചെയ്തതായി മംഗളൂരു സിറ്റി പോലീസ് കമ്മീഷണർ എൻ ശശി കുമാർ അറിയിച്ചു.
ഞായറാഴ്ച രാത്രിയാണ് 26 കാരനായ ബജ്റംഗ്ദൾ പ്രവർത്തകൻ ഹർഷയെ മതമൗലികവാദികൾ വെട്ടിക്കൊലപ്പെടുത്തിയത്. ഇതിനെതുടർന്ന് ശിവമോഗയിലെ അന്തരീക്ഷം സംഘർഷഭരിതമായിരുന്നു. ഹർഷയുടെ മൃതദേഹ ഘോഷയാത്രയ്‌ക്കിടെ മുസ്‌ലിം മതമൗലികവാദികൾ കല്ലേറ് നടത്തി. നിരവധി സ്വകാര്യ വാഹനങ്ങളും പൊതു സ്വത്തുക്കളും അഗ്നിക്കിരയാക്കി.
കർണാടക പോലീസ് കൊലപാതകത്തിൽ ഉൾപ്പെട്ട എട്ട് പേരെ ഇതുവരെ അറസ്റ്റ് ചെയ്തു. മുഹമ്മദ് കാഷിഫ്, സയ്യിദ് നദീം, ആസിഫുള്ള ഖാൻ, റിയാൻ ഷെരീഫ്, നിഹാൻ, അഫ്‌നാൻ എന്നിവരെയാണ് ആദ്യം അറസ്റ്റ് ചെയ്തത്. അടുത്ത ദിവസം രാവിലെ രണ്ട് പേരെ കൂടി അറസ്റ്റ് ചെയ്തതായി കർണാടക ആഭ്യന്തര മന്ത്രി ആരാഗ ജ്ഞാനേന്ദ്ര അറിയിച്ചു. പ്രദേശത്ത് 144 ഏർപ്പെടുത്തിയതായി ശിവമോഗ ഡെപ്യൂട്ടി കമ്മീഷണർ സെൽവമണി ആർ അറിയിച്ചു.
