ന്യൂഡൽഹി: യുക്രെയ്‌നെതിരെയുള്ള റഷ്യൻ സൈനിക അധിനിവേഷം അവസാനിപ്പിക്കാൻ ലോകം സഹായം തേടിയത് പ്രധാനമന്ത്രി നരേന്ദ്രമോദിയോടെന്ന് ബിജെപി എംപിയും നടിയുമായ ഹേമ മാലിനി. പ്രധാനമന്ത്രിയുടെ പേര് ലോകശ്രദ്ധനേടി. രാജ്യത്തെ പ്രധാനമന്ത്രി ഒരുപാട് ഉയരങ്ങളിൽ എത്തിച്ചു. ഇത് നമുക്ക് അഭിമാനം നൽകുന്ന വിഷയമാണെന്ന് ഹേമ മാലിനി പറഞ്ഞു.
ലോകരാജ്യങ്ങൾ പ്രധാനമന്ത്രിയെ അത്രയേറെ ബഹുമാനിക്കുന്നുവെന്നതിനുള്ള തെളിവാണ് ഇതെന്നും ഹേമ മാലിനി വ്യക്തമാക്കി. അതിനാലാണ് റഷ്യൻ യുദ്ധം അവസാനിപ്പിക്കാൻ ലോകം നരേന്ദ്രമോദിയുടെ സഹായം തേടിയത്. കഴിഞ്ഞ കുറച്ച് വർഷങ്ങൾക്കൊണ്ട് നരേന്ദ്രമോദി രാജ്യത്തിന് പുതിയ രൂപം നൽകിയെന്നും അവർ പറഞ്ഞു. തെരഞ്ഞെടുപ്പ് പ്രചാരണത്തിനിടെയാണ് ഹേമ മാലിനിയുടെ പ്രസ്താവന.
മുൻ പ്രധാനമന്ത്രിമാരെക്കാൾ രാജ്യത്തിന് വേണ്ടി കഠിനമായി പ്രവർത്തിച്ചയാളാണ് നരേന്ദ്രമോദി. അദ്ദേഹം മദ്ധ്യസ്ഥത വഹിച്ചാൽ ഈ യുദ്ധം അവസാനിപ്പിക്കാനാകുമെന്ന് ലോകത്തിന് ഉറപ്പുണ്ട്. ജനങ്ങൾക്ക് അദ്ദേഹത്തെ പൂർണ്ണ വിശ്വാസവുമുണ്ട്. ഇന്ത്യ ലോക ഗുരുവാകുമെന്നും ഹേമ മാലിനി പറഞ്ഞു. നേരത്തെ യുക്രെയ്ൻ വിഷയത്തിൽ പ്രധാനമന്ത്രി നരേന്ദ്രമോദി റഷ്യൻ പ്രസിഡന്റ് വ്‌ളാഡിമിർ പുടിനുമായി സംസാരിച്ചിരുന്നു.
നിലവിലെ സാഹചര്യം സംബന്ധിച്ചാണ് ഇരുനേതാക്കളും സംസാരിച്ചത്. ചർച്ചയിലൂടെ പ്രശ്‌ന പരിഹാരം ഉണ്ടാകുമെന്ന് പ്രധാനമന്ത്രി പുടിനോട് പറഞ്ഞിരുന്നു. യുക്രെയ്‌നിലുള്ള ഇന്ത്യക്കാരെ കുറിച്ചുള്ള ആശങ്കയും പ്രധാനമന്ത്രി പങ്കുവെച്ചു. ഇന്ത്യക്കാരെ സഹായിക്കുമെന്ന് പുടിൻ പ്രധാനമന്ത്രിയ്‌ക്ക് ഉറപ്പ് നൽകുകയും ചെയ്തിട്ടുണ്ട്.
