യാത്രകളെയും സാഹസികതയെയും അഗാധമായി പ്രണയിക്കുന്ന താരപുത്രനാരെന്ന ചോദ്യത്തന് മലയാളികൾക്ക് ഒരേയൊരു ഉത്തരമേയുള്ളൂ.. പ്രണവ് മോഹൻലാൽ.. പ്രേക്ഷകർക്ക് മുമ്പിൽ വിനയത്തിന്റെ മൂർത്തീഭാവത്തിൽ എത്തുമ്പോഴും പ്രണവിനുള്ളിലൊരു സാഹസികനുണ്ടെന്ന് എല്ലാവർക്കുമറിയാം.. താരം പലപ്പോഴായി പങ്കുവെക്കുന്ന വിശേഷങ്ങൾ, മറ്റു താരങ്ങളും സുഹൃത്തുക്കളും പ്രണവിനെക്കുറിച്ച് പറയുന്ന കഥകൾ, ആദി എന്ന ജിത്തു ജോസഫ് ചിത്രം ഇതെല്ലാം പ്രണവിലെ സാഹസികനായ വ്യക്തിയെ കാണിച്ചുതന്നതാണ്.
ആദ്യമൊക്കെ മലയാളികൾക്കൊരു അമ്പരപ്പ് ആയിരുന്നുവെങ്കിലും പിന്നീടത് ശീലമായി. സാധാരണക്കാരിൽ സാധാരണക്കാരനായി പൊതുജനങ്ങൾക്കിടയിലെത്തുന്ന പ്രണവ്, മഹാനടൻ മോഹൻലാലിന്റെ മകനാണെന്ന് തോന്നിപ്പിക്കാറില്ലെന്ന കാര്യം സഹതാരങ്ങൾ എപ്പോഴും പങ്കുവെക്കാറുമുണ്ട്..
കാണുന്ന മലയും കുന്നുമെല്ലാം താണ്ടാറുള്ള പ്രണവ് വീണ്ടും സമൂഹമാദ്ധ്യമങ്ങളിൽ വീണ്ടും ചർച്ചയായത് പുതിയതായി ഒരു ഇൻസ്റ്റഗ്രാം വീഡിയോ ഷെയർ ചെയ്തതോടെയാണ്. ഹൃദയം എന്ന വിനീത് ശ്രീനിവാസ് ചിത്രത്തിന്റെ തരംഗം വിട്ടുമാറാത്ത ആരാധകർക്കായി പ്രണവ് പങ്കുവെച്ച ദൃശ്യങ്ങൾ ഏറെ ത്രസിപ്പിക്കുന്നതാണ്.
2017ലെ വീഡിയോ ദൃശ്യമാണ് പ്രണവ് ഇപ്പോൾ പങ്കുവെച്ചിരിക്കുന്നത്. തായ്ലാൻഡിലെ ബോൾഡെറിങ് ഗുഹയിൽ നിന്നുള്ളതാണ് ദൃശ്യങ്ങൾ. ടോൺസായ് എന്ന പ്രദേശത്ത് സ്ഥിതിചെയ്യുന്ന ഗുഹയിൽ സ്പൈഡർമാനെ പോലെ സഞ്ചരിക്കുന്ന പ്രണവിനെ കണ്ട് ആരാധകർക്ക് ഇരിപ്പുറപ്പിക്കാനായില്ല. കൂർമ്പാച്ചി മലയിൽപ്പെട്ടുപോയ ബാബുവിന്റെ രക്ഷാദൗത്യം സിനിമയായാൽ മറ്റൊരു ഓപ്ഷനെക്കുറിച്ച് സംവിധായകർക്ക് ഇനി ചിന്തിക്കേണ്ട എന്നാണ് വീഡിയോക്ക് താഴെ പ്രതികരണങ്ങളെത്തിയത്. റാംബോ മല്ലു വേർഷൻ എന്നും മല്ലു സ്പൈഡർമാനെന്നും പലരും വിശേഷിപ്പിച്ചു. ഹൃദയത്തിന് ശേഷം ആരാധാകരുടെ ഹൃദയത്തിൽ വീണ്ടും സ്ഥാനമുറപ്പിച്ച നടന് ആശംസാപ്രവാഹമാണ് വീഡിയോ പങ്കുവെച്ചതോടെ എത്തുന്നത്.
Comments