രാജ്കോട്ട്: രഞ്ജി ട്രോഫി മത്സരത്തിനായുള്ള പരിശീലനത്തിനിടെ പരിക്കേറ്റ് കേരള ക്രിക്കറ്റ് ടീം അംഗം എസ്.ശ്രീശാന്തിനെ ആശുപത്രിയില് പ്രവേശിപ്പിച്ചു. ഇതോടെ രഞ്ജി ട്രോഫിയില് ശേഷിക്കുന്ന മത്സരങ്ങള് കൂടി ശ്രീശാന്തിന് നഷ്ടമാകും. രഞ്ജി ട്രോഫിയില് ഗുജറാത്തിനെതിരായ മത്സരത്തിന് മുന്പ് നടന്ന പരിശീലനത്തിനിടെയാണ് ശ്രീശാന്തിന് പരിക്കേല്ക്കുന്നത്. സമൂഹമാദ്ധ്യമങ്ങളിലൂടെയാണ് ശ്രീശാന്ത് ഇക്കാര്യം അറിയിച്ചത്.
പരിശീലന സെഷനിടെ പരിക്കേറ്റുവെന്നും നടക്കാന് ബുദ്ധിമുട്ട് ഉണ്ടെന്നും ശ്രീശാന്ത് സമൂഹമാദ്ധ്യമത്തിലൂടെ അറിയിച്ചിരുന്നു. ഇക്കാരണത്താല് തന്നെ ഗുജറാത്തിനെതിരായ മത്സരത്തില് ശ്രീശാന്ത് കളിച്ചിരുന്നില്ല. ഇതിന് പിന്നാലെയാണ് ആശുപത്രിയില് കിടക്കുന്ന ചിത്രം ശ്രീശാന്ത് ട്വിറ്റര് അക്കൗണ്ടിലൂടെ പങ്കുവച്ചത്. ഇനിയുള്ള കളികളില് ശ്രീശാന്തിന് പങ്കെടുക്കാനാകുമോ എന്ന കാര്യം കെസിഎയും വ്യക്തമാക്കിയിട്ടില്ല.
രഞ്ജിയിലേക്കുള്ള തിരിച്ചുവരവില് മേഘാലയക്കെതിരായ ആദ്യ മത്സരത്തില് ശ്രീശാന്ത് രണ്ട് വിക്കറ്റ് നേടിയിരുന്നു. അതേസമയം രഞ്ജിയില് തുടര്ച്ചയായ രണ്ട് മത്സരങ്ങളിലും കേരളം മികച്ച വിജയമാണ് നേടിയത്. ആദ്യ മത്സരത്തില് മേഘാലയയേയും രണ്ടാം മത്സരത്തില് ഗുജറാത്തിനേയുമാണ് കേരളം പരാജയപ്പെടുത്തിയത്.
