ന്യൂഡല്‍ഹി: രക്ഷാപ്രവര്‍ത്തനം എന്തുകൊണ്ട് നേരത്തെ തുടങ്ങിയില്ലെന്ന മാദ്ധ്യമപ്രവര്‍ത്തകയുടെ ചോദ്യത്തിന് ചുട്ട മറുപടി നല്‍കി കേന്ദ്ര വ്യോമയാന മന്ത്രി ജ്യോതിരാദിത്യ സിന്ധ്യ. യുദ്ധം എപ്പോള്‍ തുടങ്ങുമെന്ന് ആര്‍ക്കും പ്രവചിക്കാനാകുന്ന കാര്യമല്ലെന്നും, പ്രതിസന്ധി ഉണ്ടായ ആ നിമിഷം മുതല്‍ വിദ്യാര്‍ത്ഥികളെ രക്ഷിക്കാനായി അക്ഷീണം പ്രയത്‌നിച്ച് കൊണ്ടിരിക്കുകയാണെന്നും ജ്യോതിരാദിത്യ സിന്ധ്യ പറഞ്ഞു. ‘ യുദ്ധം ഏത് സമയത്ത് തുടങ്ങുമെന്ന് ഭരിക്കുന്ന പാര്‍ട്ടിക്കോ, പ്രതിപക്ഷ പാര്‍ട്ടികള്‍ക്കോ ഒന്നും പറയാന്‍ സാധിക്കില്ല. യുക്രെയ്‌നില്‍ യുദ്ധം ആരംഭിച്ച ആ നിമിഷം മുതല്‍ നമ്മുടെ എല്ലാ കുട്ടികളേയും പുറത്തെത്തിക്കായി 24 മണിക്കൂറും പ്രവര്‍ത്തിച്ച് കൊണ്ടിരിക്കുകയാണ്.
19760 വിദ്യാര്‍ത്ഥികളാണ് യുക്രെയ്‌നില്‍ ഉണ്ടായിരുന്നത്. യുദ്ധം തുടങ്ങുന്നതിന് മുന്‍പ് മുന്നറിയിപ്പുകള്‍ നല്‍കിയിരുന്നു. 4800 പേര്‍ യുദ്ധം തുടങ്ങുന്നതിന് മുന്‍പ് തന്നെ രാജ്യം വിട്ടു. അവശേഷിക്കുന്ന 14000 പേരായിരുന്നു അവിടെ ബാക്കി ഉണ്ടായിരുന്നത്. ഇനിയും ആയിരത്തോളം പേര്‍ യുക്രെയ്‌നില്‍ കുടുങ്ങി കിടക്കുന്നുണ്ട്. ആറ് ദിവസം കൊണ്ട് 13,000ത്തോളം പേരെ യുക്രെയ്‌നില്‍ നിന്ന് പുറത്തെത്തിച്ചു. അയല്‍രാജ്യങ്ങളില്‍ ഇവരെ സുരക്ഷിതമായി പുറത്തെത്തിച്ച ശേഷം ഇന്ത്യയില്‍ എത്തിക്കാനുള്ള നീക്കങ്ങളാണ് നടക്കുന്നത്.’
ഓപ്പറേഷന്‍ ഗംഗയെ പിആര്‍ വര്‍ക്കായി ഉപയോഗിക്കുന്നുവെന്ന ആരോപണങ്ങളേയും അദ്ദേഹം തള്ളി. ‘ എന്റെ ഹൃദയവും മനസുമെല്ലാം ഇവിടുത്തെ ഓരോ കുട്ടിക്കും ഒപ്പമാണ്. വിമാനത്താവളത്തില്‍ എത്തുന്ന ഓരോ കുട്ടികളുടേയും വേദന മനസിലാകും. എനിക്ക് ഒരു ദൗത്യം നല്‍കിയിരുന്നു. അതില്‍ മാത്രമാണ് ശ്രദ്ധിക്കുന്നത്. ഏത് അടിയന്തരാവസ്ഥക്കാലത്തും ഇരുന്ന് വിമര്‍ശനങ്ങള്‍ നടത്തുന്നവരുണ്ട്. അത്തരക്കാരെ സഹായിക്കാന്‍ എനിക്ക് ഒരു രീതിയിലും സാധിക്കില്ല. മണലില്‍ തല പൂഴ്‌ത്തിവച്ച് ഒട്ടകപക്ഷി വിമര്‍ശിക്കുന്നത് പോലെയാണത്. അതൊരിക്കലും എന്റെ മനോഭാവമല്ലെന്നും’ ജ്യോതിരാദിത്യ സിന്ധ്യ പറഞ്ഞു.
