കാസർകോട്: ഒരേ സ്കൂളിലെ എഴ് വിദ്യാർത്ഥിനികൾ പീഡിപ്പിക്കപ്പെട്ട സംഭവത്തിൽ രണ്ട് പേർ അറസ്റ്റിൽ. അരങ്ങാനടുക്കം സ്വദേശി മാധവൻ, മണി എന്നിവരാണ് അറസ്റ്റിലായത്. ഇനിയും രണ്ട് പേർ കൂടി പിടിയിലാകാനുണ്ടെന്ന് പോലീസ് അറിയിച്ചു. ബേക്കൽ, അമ്പലത്തറ സ്റ്റേഷനുകളിലായി ആകെ ഏഴ് കേസുകളാണ് രജിസ്റ്റർ ചെയ്തിരിക്കുന്നത്.
കഴിഞ്ഞ ബുധനാഴ്ചയാണ് സംസ്ഥാനത്ത് ഞെട്ടിപ്പിക്കുന്ന വെളിപ്പെടുത്തൽ ഉണ്ടായത്. ഒരേ സ്കൂളിലെ ഏഴ് പെൺകുട്ടികളാണ് ലൈംഗികമായി പീഡിപ്പിക്കപ്പെട്ടുവെന്ന വിവരം പുറത്തറിയിച്ചത്. കൗൺസിലിങ്ങിനിടെയാണ് കുട്ടികൾ ഇക്കാര്യം വെളിപ്പെടുത്തിയത്. ഏഴ് പേരും പരാതി നൽകാൻ തയ്യാറായതോടെ പോലീസ് ഏഴ് പോക്സോ കേസുകളെടുത്തു.
സ്കൂളിൽ നടത്തിയ പോക്സോ ബോധവത്കരണ പരിപാടിക്ക് പിന്നാലെ ആർക്കെങ്കിലും നേരെ പീഡന ശ്രമങ്ങൾ സംഭവിച്ചിട്ടുണ്ടെങ്കിൽ തുറന്ന് പറയണമെന്നും കുറ്റക്കാർക്കെതിരെ നടപടിയെടുക്കുമെന്നും അധികൃതർ പറഞ്ഞിരുന്നു. ഇതിന് പിന്നാലെ കൗൺസിലിംഗ് നടത്തുന്നതിനിടെ വിദ്യാർത്ഥികൾ പീഡനം വിവരം തുറന്നു പറയുകയായിരുന്നു. അയൽവാസികളും അകന്ന ബന്ധത്തിൽപ്പെട്ടവരും പീഡിപ്പിച്ചുവെന്നാണ് വിദ്യാർത്ഥിനികൾ വെളിപ്പെടുത്തിയത്. നാല് വർഷം മുമ്പായിരുന്നു സംഭവം. അഞ്ച്, ആറ് ക്ലാസുകളിൽ പഠിക്കുമ്പോഴായിരുന്നു പീഡനം നടന്നതെന്നും കുട്ടികൾ മൊഴി നൽകി. സംഭവത്തിൽ അന്വേഷണം പുരോഗമിക്കുകയാണ്.
Comments