കണ്ണൂര്: തളിപ്പറമ്പ് മുന് എംഎല്എയും സിപിഎം സംസ്ഥാന കമ്മറ്റി അംഗവുമായിരുന്ന ജയിംസ് മാത്യു സജീവ രാഷ്ട്രീയം ഉപേഷിക്കുന്നു. രാഷ്ട്രീയത്തില് നിന്നു വിരമിച്ചാല് ജൈവകൃഷിയും വിദേശയാത്രയുമാണ് പദ്ധതി. രാഷ്ട്രീയക്കാര്ക്ക് വിരമിക്കല് വേണമെന്ന നിലപാടുകാരനായിരുന്നു ജയിംസ് മാത്യു. ഇക്കാര്യം അടുത്ത കേന്ദ്രങ്ങളോട് അദ്ദേഹം തുറന്നു പറഞ്ഞിരുന്നു. തന്റെ നിലപാട് ജീവിതത്തില് പകര്ത്തുകയാണ് വിരമിക്കല് കൊണ്ട് അദ്ദേഹം ഉദ്ദേശിക്കുന്നത്. കഴിഞ്ഞ ദിവസം സമാപിച്ച സിപിഎം സംസ്ഥാന സമ്മേളനത്തില് സംസ്ഥാന കമ്മറ്റിയില് നിന്ന് ഒഴിഞ്ഞു. നിലവില് ജില്ലാഭാരവാഹിത്വവും ഇല്ല.
സമിതിയില് പാര്ട്ടിയുടെ അനുമതി ലഭിച്ചാല് രാഷ്ട്രീയം വിട്ട് ജൈവകൃഷിയിലേക്ക് തിരിയും. കാസര്കോട് ജൈവകൃഷി നടത്താനാണ് പദ്ധതി. പാര്ട്ടി കോണ്ഗ്രസ് അവസാനിച്ചാല് ഏപ്രിലില് ദീര്ഘയാത്രയ്ക്കും പദ്ധതിയുണ്ട്. റിട്ടയര്മെന്റ് പോലെ തന്നെ ദീര്ഘയാത്രയും അദ്ദേഹം സൃഹൃത്തുക്കളുമായി പങ്കുവച്ചിരുന്നു. ഇതിന്റെ അടിസ്ഥാനത്തില് കൂടിയാണ് ഭാരവാഹിത്വങ്ങളില് നിന്ന് അദ്ദേഹം ഒഴിഞ്ഞത്.
എസ്എഫ്ഐയിലൂടെ വളര്ന്ന് സജീവരാഷ്ട്രീയത്തില് എത്തിയ ജയിംസിന് പാര്ട്ടിയില് നാലുപതിറ്റാണ്ടിന്റെ പ്രവര്ത്തനപാരമ്പര്യമുണ്ട്. രണ്ടു തവണ തളിപ്പറമ്പില് എംഎല്എയായിരുന്ന ജയിംസ് മികച്ച പാര്ലമെന്റേറിയനും കൂടിയായിരുന്നു. എന്നാല് രാഷ്ട്രീയമായ പിന്മടക്കത്തിനു പിന്നില് ബിസിനസ് താല്പര്യമാണെന്നും ആരോപണമുയരുന്നു.
Comments