ആലപ്പുഴ ; കെ റെയിൽ സമരത്തിനിടെ പോലീസിനെതിരെ അസഭ്യം പറഞ്ഞതിന് കൊടിക്കുന്നിൽ സുരേഷ് എംപിക്കെതിരെ കേസ്. കഴിഞ്ഞ ദിവസം ചെങ്ങന്നൂരിൽ സിൽവർ ലൈന്‍ പദ്ധതിയുടെ കല്ലിടാൻ എത്തിയവരെ കൊടിക്കുന്നിൽ സുരേഷ് എംപിയുടെ നേതൃത്വത്തിൽ തടഞ്ഞിരുന്നു .
എന്നാൽ തന്നെ ഏൽപ്പിച്ച ജോലി പൂർത്തിയാക്കാതെ മടങ്ങില്ലെന്ന് ഉദ്യോഗസ്ഥൻ പറഞ്ഞതോടെ എംപി രോഷാകുലനാകുകയായിരുന്നു.‘തെമ്മാടിത്തരം കാണിക്കരുത്. ‘ താൻ ആരാണ്? ഒരു സബ് ഇൻസ്പെക്ടർ. തന്നെക്കാളും വലിയ ആളാടോ ഞാൻ. തന്റെ മുകളിലുള്ള ഉദ്യോഗസ്ഥരെക്കാളും വലിയ ആളാ ഞാൻ. ഞാൻ ഇവിടുത്തെ ജനപ്രതിനിധിയാണ്. നിങ്ങൾ മടങ്ങി പോകണം.’ ഇങ്ങനെയായിരുന്നു എം പി യുടെ രോഷപ്രകടനം .
ഇതിന്റെ വീഡിയോ അടക്കം പുറത്തുവന്നിരുന്നു. ഇതിന്റെ അടിസ്ഥാനത്തിലാണ് ചെങ്ങന്നൂര്‍ പോലീസ് കേസെടുത്തത്. എം.പിയുടെ നേതൃത്വത്തില്‍ ചിലര്‍ കൃത്യനിര്‍വഹണം തടസ്സപ്പെടുത്തിയതായും സി.ഐ അടക്കമുള്ള ഉദ്യോഗസ്ഥരെ അവഹേളിച്ചതായും പോലീസ് പറഞ്ഞു.
അതേസമയം, പോലീസ് തന്നെ അപമാനിച്ചെന്നും പരാതി നൽകുമെന്നും എംപി പറഞ്ഞു. പോലീസ് പ്രതിഷേധക്കാരെ ക്രൂരമായി നേരിട്ടപ്പോൾ നാടൻ ഭാഷയിൽ തനിക്ക് സംസാരിക്കേണ്ടി വന്നുവെന്നാണ് സംഭവത്തെക്കുറിച്ച് എംപി പറയുന്നത് .
