മഥുര: ഉത്തർപ്രദേശിൽ ബിജെപി നേടിയ വൻ വിജയത്തെ പ്രശംസിച്ച് മഥുരയിൽ നിന്നുള്ള ബിജെപി എംപി ഹേമമാലിനി. ബുൾഡോസറിന് മുന്നിൽ മറ്റൊന്നിനും വരാൻ കഴിയില്ലെന്നാണ് യോഗി സർക്കാരിനെ പ്രശംസിച്ച് ഹേമമാലിനി പറഞ്ഞത്. യോഗി സർക്കാരിന്റെ നേതൃത്വത്തിൽ അനധികൃത സ്ഥലം കയ്യേറലിന് എതിരെ യോഗി സർക്കാർ കർശന നടപടികൾ സ്വീകരിച്ചിരുന്നു. അനധികൃത കെട്ടിട നിർമ്മാണങ്ങൾ കണ്ടെത്തി അതിവേഗമാണ് പൊളിച്ചു നീക്കിയത്. ഇത് സൂചിപ്പിച്ചാണ് യോഗി സർക്കാരിനെ ബുൾഡോസറുമായി ഹേമമാലിനി ഉപമിച്ചത്.
ഉത്തർപ്രദേശിന്റെ എല്ലാ മേഖലകളിലും ബിജെപി വികസനം സാധ്യമാക്കിയെന്നും ഹേമമാലിനി പറഞ്ഞു. ‘ എനിക്കുറപ്പായിരുന്നു നമ്മുടെ സർക്കാർ തന്നെ വീണ്ടും അധികാരത്തിൽ എത്തുമെന്ന്. വികസനത്തെ മുൻനിർത്തിയാണ് ബിജെപി പ്രചാരണം നടത്തിയത്. അതുകൊണ്ടാണ് ജനങ്ങൾ ഞങ്ങളിൽ വിശ്വാസം അർപ്പിച്ചത്. ഒരു ബുൾഡോസറിന്റെ മുന്നിൽ മറ്റൊന്നും ധൈര്യത്തോടെ വന്ന് നിൽക്കില്ല. കാരണം നിമിഷങ്ങൾക്കുള്ളിൽ തന്നെ മുന്നിലുള്ളതിനെ തരിപ്പണമാക്കാൻ അതിന് സാധിക്കും. അത് സൈക്കിളായാലും മറ്റെന്തായാലും ശരി’ ഹേമമാലിനി പറഞ്ഞു.
ആകെയുള്ള 403 സീറ്റുകളിൽ 276 സീറ്റുകളിലാണ് ബിജെപി ലീഡ് ചെയ്യുന്നത്. മുഖ്യമന്ത്രിയും മന്ത്രിമാരും ഉൾപ്പെടെ ഉള്ളവർ വലിയ ഭൂരിപക്ഷത്തോടെയാണ് മുന്നേറുന്നത്. 121 സീറ്റുകളിലാണ് എസ്പി ലീഡ് ചെയ്യുന്നത്. രണ്ടിടത്ത് മാത്രമാണ് കോൺഗ്രസിന് മുന്നേറ്റം ഉണ്ടാക്കാൻ സാധിച്ചിരിക്കുന്നത്.
Comments