ന്യൂഡൽഹി: വോട്ടെണ്ണൽ അവസാന മണിക്കൂറിലേയ്ക്ക് അടുക്കുമ്പോൾ, ഉത്തർപ്രദേശിൽ വമ്പിച്ച ഭൂരിപക്ഷത്തോടെ മുന്നേറുകയാണ് ബിജെപി. തിരഞ്ഞെടുപ്പിൽ വിജയത്തിനരികെ നിൽക്കുമ്പോൾ നേതാക്കളെയും, പ്രവർത്തകരെയും അഭിനന്ദനങ്ങൾക്കൊണ്ട് മൂടുകയാണ് കേന്ദ്രമന്ത്രി പീയുഷ് ഗോയൽ. പ്രധാനമന്ത്രിയുടെയും യോഗി ആദിത്യനാഥിന്റെയും അകമഴിഞ്ഞ പ്രവർത്തനങ്ങളും സമൂഹത്തോടുള്ള പ്രതിബദ്ധതയുമാണ് ബിജെപിയെ വിജയത്തിലേയ്ക്ക് നയിക്കുന്നതെന്ന് പീയുഷ് ഗോയൽ പറഞ്ഞു.
‘പ്രധാനമന്ത്രിയുടെ ജനപിന്തുണയാണ് തിരഞ്ഞെടുപ്പ് ഫലങ്ങൾ വ്യക്തമാക്കുന്നത്. മുഖ്യമന്ത്രി യോഗി ആദിത്യനാഥിന്റെയും, പ്രധാനമന്ത്രി നരേന്ദ്ര മോദിയുടെയും കാപട്യമില്ലാത്ത ജനസേവനത്തിന്റെയും, സമൂഹത്തോടുള്ള പ്രതിബദ്ധതയുടെയും ഫലമാണിത്. ഉത്തർപ്രദേശിൽ വികസനത്തിന്റെ ബുൾഡോസർ ഇനിയും പ്രവർത്തനം തുടരും. ഗോവയിലും, മണിപ്പൂരിലും ബിജെപിയ്ക്ക് ലഭിക്കുന്ന പിന്തുണയും വളരെ അധികം പ്രശംസനീയമാണ്’ പീയുഷ് ഗോയൽ അറിയിച്ചു.
ഉത്തർപ്രദേശിലെ വോട്ടെണ്ണൽ പുരോഗമിക്കുമ്പോൾ, ആകെയുള്ള 403 സീറ്റുകളിൽ 271 സീറ്റുകളിലാണ് ബിജെപി ലീഡ് ചെയ്യുന്നത്. മുഖ്യമന്ത്രി യോഗി ആദിത്യനാഥ് വൻ ഭൂരിപക്ഷത്തോടെ മുന്നേറുകയാണ്. സമാജ് വാദി പാർട്ടി നേതാവ് അഖിലേഷ് യാദവും ലീഡ് ചെയ്യുന്നുണ്ട്.
