ബെംഗളൂരു: രാജ്യാന്താര ചലച്ചിത്രോത്സവത്തിൽ ശ്രദ്ധേയമായി ഉണ്ണി മുകുന്ദൻ ചിത്രം ‘മേപ്പടിയാൻ’. ചലച്ചിത്രോത്സവത്തിന്റെ ആദ്യദിനത്തിൽ, ബെംഗളൂരുവിലെ പിവിആർ സിനിമാസിലെ എട്ടാം നമ്പർ സ്‌ക്രീനിലായിരുന്നു മേപ്പടിയാന്റെ പ്രദർശനം. 2021-ലെ ഇന്ത്യൻ സിനിമ വിഭാഗത്തിൽ മികച്ച ചിത്രത്തിനുള്ള പുരസ്‌കാരമാണ് മേപ്പടിയാൻ സ്വന്തമാക്കിയത്. ഉണ്ണി മുകുന്ദൻ തന്നെയാണ് ഇക്കാര്യം ഫേസ്ബുക്കിലൂടെ അറിയിച്ചത്.
കർണാടക ഗവർണർ തവർ ചന്ദ് ഗെഹ്ലോട്ടാണ് അവാർഡ് സമ്മാനിച്ചത്. ഉണ്ണി മുകുന്ദനും, മേപ്പടിയാന്റെ സംവിധായകൻ വിഷ്ണു മോഹനും ചേർന്നാണ് പുരസ്‌കാരം ഏറ്റുവാങ്ങിയത്. ഡോ സി എൻ അശ്വത് നാരായൺ (ഉന്നത വിദ്യാഭ്യാസ, ഐടി-ബിടി, ശാസ്ത്ര സാങ്കേതിക മന്ത്രി), ഡി വി സദാനന്ദ ഗൗഡ (എംപി), പി രവി എന്നിവരുടെ സാന്നിധ്യത്തിലായിരുന്നു പുരസ്‌കാരദാനം. കുമാർ ഐഎഎസ് (ചീഫ് സെക്രട്ടറി), സുനീൽ പുരാണിക് (കർണാടക ചലച്ചിത്ര അക്കാദമി ചെയർമാൻ), ഡി ആർ ജയരാജ് (കർണാടക ഫിലിം ചേംബർ ഓഫ് കൊമേഴ്സ് പ്രസിഡന്റ്) എന്നിവരും ചടങ്ങിൽ പങ്കെടുത്തു.
‘ഇന്ത്യൻ പനോരമ വിഭാഗത്തിൽ നൂറിൽ അധികം ചിത്രങ്ങൾക്കൊപ്പമായിരുന്നു മേപ്പടിയാൻ മത്സരിച്ചത്. മേപ്പടിയാന്റെ ഭാഗമായി പ്രവർത്തിച്ച എല്ലാവരോടും ഈ അവസരത്തിൽ നന്ദി അറിയിക്കുന്നു. വളരെ അധികം അഭിമാനം തോന്നുന്ന നിമിഷമാണിത്. എന്റെ മാതാപിതാക്കൾക്കും, ഗുരുക്കന്മാർക്കും, സുഹൃത്തുകൾക്കും, ഈ സിനിമയുടെ വിജയത്തിൽ പങ്കാളികളായ ഓരോരുത്തർക്കും അർഹതപ്പെട്ടതാണ് ഈ നേട്ടം’ ഉണ്ണി മുകുന്ദൻ ഫേസ്ബുക്കിൽ കുറിച്ചു.
https://www.facebook.com/IamUnniMukundan/posts/503840544443479
ഉണ്ണി മുകുന്ദനെ നായകനാക്കി നവാഗതനായ വിഷ്ണു മോഹൻ സംവിധാനം ചെയ്ത ചിത്രമാണ് മേപ്പടിയാൻ. ജനുവരി 14നാണ് ചിത്രം റിലീസ് ചെയ്തത്. വർക്ക് ഷോപ്പ് നടത്തിപ്പുകാരനായ ജയകൃഷ്ണൻ എന്ന തനി നാട്ടിൻപുറംകാരൻ യുവാവായിട്ടാണ് ഉണ്ണി അഭിനയിക്കുന്നത്. അഞ്ജു കുര്യനാണ് നായിക. ഇന്ദ്രൻസ്, സൈജു കുറുപ്പ്, അജു വർഗീസ്, വിജയ് ബാബു, കലാഭവൻ ഷാജോൺ, മേജർ രവി, ശങ്കർ രാമകൃഷ്ണൻ, ശ്രീജിത്ത് രവി, കോട്ടയം രമേശ്, കൃഷ്ണ പ്രസാദ്, കുണ്ടറ ജോണി, ജോർഡി പൂഞ്ഞാർ, സ്മിനു, പൗളി വത്സൻ, മനോഹരിയമ്മ തുടങ്ങിയവരും ഈ ചിത്രത്തിൽ പ്രധാന വേഷങ്ങളിൽ എത്തിയിരുന്നു.
