ബംഗളൂരു : കശ്മീരി പണ്ഡിറ്റുകളുടെ യാതനകളുടെ കഥ പറയുന്ന ചിത്രം ദി കശ്മീർ ഫയൽസിന് നികുതി ഒഴിവാക്കി കൂടുതൽ സംസ്ഥാനങ്ങൾ. കർണാടകയാണ് പുതുയായി സിനിമ നികുതി രഹിതമായി പ്രഖ്യാപിച്ചത്. മുഖ്യമന്ത്രി ബസവരാജ് ബൊമ്മെ ട്വിറ്ററിലൂടെയാണ് ഇക്കാര്യം അറിയിച്ചത്.
സ്വന്തം ജന്മനാട്ടിൽ നിന്നുള്ള കശ്മീരി പണ്ഡിറ്റുകളുടെ കൂട്ടപ്പലായനത്തിന്റെ നടുക്കുന്ന യഥാർത്ഥ സംഭവങ്ങൾ ദി കശ്മീർ ഫയൽസിലൂടെ അനാവരണം ചെയ്തിൽ വിവേക് അഗ്നിഹോത്രിയ്ക്ക് അഭിനന്ദനങ്ങൾ. സംസ്ഥാനത്ത് ദി കശ്മീർ ഫയൽസ് നികുതി രഹിതമായി പ്രദർശിപ്പിക്കും. സിനിമയ്ക്കുള്ള തങ്ങളുടെ പിന്തുണയാണ് ഇത്. സിനിമ കാണാൻ കൂടുതൽ പേർക്ക് ഇത് പ്രചോദനമാകും.- ബസവരാജ് ബൊമ്മെ ട്വിറ്ററിൽ കുറിച്ചു.
നിലവിൽ കർണാടക ഉൾപ്പെടെ നാല് സംസ്ഥാനങ്ങളാണ് ദി കശ്മീർ ഫയൽസ് നികുതി രഹിതമായി പ്രഖ്യാപിച്ചത്. ഗുജറാത്ത്, മദ്ധ്യപ്രദേശ്, ഹരിയാന എന്നീ സംസ്ഥാനങ്ങളാണ് കർണാടകയ്ക്ക് പുറമേ സിനിമയ്ക്ക് നികുതി ഒഴിവാക്കിയത്.
