ഒരു പൂച്ചയുടെ ചിത്രത്തിന് ഒരാളുടെ വ്യക്തിത്വം നിശ്ചയിക്കാൻ സാധിക്കുമെന്ന് പറഞ്ഞാൽ നിങ്ങൾ വിശ്വസിക്കുമോ? എന്നാൽ സംഗതി സത്യമാണ്. പൂച്ചയുടെ ഒപ്റ്റിക്കൽ ഇല്യൂഷൻ ചിത്രത്തിലൂടെ ഒരാൾ ശുഭാപ്തി വിശ്വാസക്കാരനാണോ അതോ അല്ലെയോ എന്ന് തിരിച്ചറിയാൻ സാധിക്കുമെന്നാണ് ‘ദ മൈൻഡ്സ് ജേർണൽ’ എന്ന മാസിക അവകാശപ്പെടുന്നത്.
കോണിപ്പടികളിൽ നിൽക്കുന്ന പൂച്ചയുടെ ഒരു ഗ്രേസ്കെയിൽ ചിത്രമാണ് ‘ദ മൈൻഡ്സ് ജേർണൽ’ പങ്കുവെച്ചത്. പൂച്ച കോണിപ്പടികളിലൂടെ താഴോട്ടിറങ്ങുകയാണോ, അതോ മുകളിലോട്ട് കയറുകയാണോ എന്നാണ് ചോദ്യം. ഈ ചോദ്യത്തിന് ഒരാൾ നൽകുന്ന ഉത്തരത്തിലൂടെ അയാൾക്ക് ജീവിതത്തോടുള്ള കാഴ്ചപ്പാട് എന്താണെന്ന് തിരിച്ചറിയാനാകുമെന്നാണ് മാസിക പറയുന്നത്.
പൂച്ച കോണിപ്പടികളിലൂടെ മുകളിലേയ്ക്ക് കയറുന്നതായാണ് തോന്നുന്നതെങ്കിൽ, ആ വ്യക്തി ശുഭാപ്തി വിശ്വാസക്കാരനായിരിക്കും. ജീവിതത്തിൽ ഉയരങ്ങൾ സ്വപ്നം കാണുന്ന വ്യക്തിയായിരിക്കും ഇങ്ങനെ ചിന്തിക്കുന്നത്. താഴെയ്ക്ക് വീഴുമെന്ന് ഭയക്കാതെ, എന്നും മുകളിലേയ്ക്ക് കുതിക്കാനായിരിക്കും ഈ ആളുകൾ ശ്രമിക്കുക എന്നാണ് മാസിക വിശദീകരിക്കുന്നത്.
അതേസമയം, പൂച്ച കോണിപ്പടികളിലൂടെ താഴേയ്ക്ക് ഇറങ്ങുന്നതായാണ് തോന്നുന്നതെങ്കിൽ, ആ വ്യക്തി ശുഭാപ്തി വിശ്വാസക്കാരനല്ല. അയാൾ ജീവിതത്തിൽ അനേകം താഴ്ചകൾ അനുഭവിച്ചിരിക്കാം, അതുകൊണ്ട് തന്നെ പെട്ടെന്നൊന്നും അയാൾ ഒന്നിനെയും വിശ്വസിക്കില്ലെന്നാണ് ‘ദ മൈൻഡ്സ് ജേർണൽ’ പറയുന്നത്.
എന്തായാലും ചിത്രത്തിന് ആളുകൾക്കിടയിൽ വൻ സ്വീകാര്യതയാണ് ലഭിച്ചിരിക്കുന്നത്. ‘ദ മൈൻഡ്സ് ജേർണലി’ന്റെ വിശദീകരണം കേൾക്കാതെ അനേകം ആളുകൾ ചിത്രം കണ്ട് അഭിപ്രായം രേഖപ്പെടുത്തിയിരുന്നു. എന്നാൽ വിശദീകരണം കണ്ട ശേഷം തന്റെ ചിന്താഗതി മാറ്റാൻ ശ്രമിക്കുകയാണ് ആളുകൾ.
Comments