മുംബൈ: വീണ്ടും ഏഷ്യയിലെ ഏറ്റവും വലിയ ധനികനായി റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനി. 2022 ഹുറൂൺ ലിസ്റ്റ് പ്രകാരം, നിലവിൽ ഏഷ്യയിലെ ഏറ്റവും ധനികൻ അംബാനിയാണ്. അദാനി ഗ്രൂപ്പ് ചെയർമാൻ ഗൗതം അദാനിയാണ് തൊട്ടുപിന്നിൽ.
കഴിഞ്ഞ ഒരു വർഷം കൊണ്ട് അംബാനിയുടെ ആസ്തിയിൽ 24 ശതമാനത്തിന്റെ വളർച്ചയുണ്ടായി. 20 ബില്യൺ ഡോളറാണ് 2021ൽ അംബാനി നേടിയത്. ഇതോടെ, 103 ബില്യൺ ഡോളറിന്റെ ആസ്തി അംബാനിയ്ക്കുണ്ടെന്നാണ് ഹുറൂൺ റിച്ച് ലിസ്റ്റ് രേഖപ്പെടുത്തിയിരിക്കുന്നത്.
അതേസമയം, അദാനിയുടെ ആസ്തി ഒരു വർഷം കൊണ്ട് 49 ബില്യൺ ഡോളറായി വർദ്ധിച്ചു. കഴിഞ്ഞ പത്ത് വർഷക്കാലത്തിനിടെ അദാനിയുടെ സമ്പാദ്യത്തിൽ 400 ശതമാനത്തിന്റെ വളർച്ചയാണുണ്ടായതെന്നും ഹുറൂൺ റിച്ച് ലിസ്റ്റ് വ്യക്തമാക്കുന്നു. മുൻപ് ബ്ലൂംസ്ബെർഗിന്റെയും ഫോർബ്സ് മാസികയുടെയും കണക്കുകൾ പ്രകാരം ഏഷ്യയിലെ ഏറ്റവും വലിയ ധനികൻ ഗൗതം അദാനിയായിരുന്നു. എന്നാൽ പുതിയ കണക്കുകൾ പുറത്ത് വരുമ്പോൾ, അദാനിയെ അംബാനി കടത്തിവെട്ടി.
റിയൽ എസ്റ്റേറ്റ് സ്ഥാപനമായ എം3എമ്മുമായി ചേർന്ന് ഗവേഷണ പ്ലാറ്റ്ഫോമായ ഹുറൂണാണ് റിച്ച് ലിസ്റ്റ് തയ്യാറാക്കിയത്. 2,557 കമ്പനികളിൽ നിന്നും 69 രാജ്യങ്ങളിൽ നിന്നുമായി 3,381 ശതകോടീശ്വരന്മാരാണ് പട്ടികയിൽ ഉൾപ്പെട്ടിരിക്കുന്നത്.
Comments