ന്യൂഡൽഹി: ചരിത്രത്തിലാദ്യമായി വിവിധ രാജ്യങ്ങളിലെ പ്രതിരോധ സേനയുടെ ഭാഗമായ സിഖ് മതസ്ഥരെ ഒരു കുടക്കീഴിൽ അണിനിരത്തി വീഡിയോ പുറത്തിറക്കി. ഇന്ന് ആഘോഷിക്കുന്ന സിഖ് ഉത്സവമായ ഹോള മൊഹല്ലയിൽ അവബോധവും, പ്രോത്സാഹനവും വർദ്ധിപ്പിക്കാനാണ് ദി ഡിഫൻസ് സിഖ് നെറ്റ്വർക്ക് ഇത്തരത്തിലൊരു പരിപാടി സംഘടിപ്പിച്ചത്.
യുകെ, യുഎസ്സ കാനഡ, ന്യൂസിലന്റ്, മലേഷ്യ എന്നീ രാജ്യങ്ങളിലെ പ്രതിരോധ സേനയുടെ ഭാഗമായി സിഖ് മതസ്ഥരാണ് വീഡിയോയിൽ പ്രത്യക്ഷപ്പെടുന്നത്. മൂന്ന് ദിവസം നീണ്ടുനിൽക്കുന്ന സൈനിക ഉത്സവമാണ് ഹോള മൊഹല്ല. മാർച്ച് മാസത്തിലെ ഈ ഉത്സവം ലോകമെമ്പാടും ആഘോഷിക്കുന്നു.
‘സായുധ സേനയിലെ സിഖുകാർ എന്ന നിലയിൽ, ഹോള മൊഹല്ല എന്ന ഉത്സവം ഞങ്ങളിൽ ആത്മവിശ്വാസവും, സന്തോഷവും ഉണർത്തുന്നു’ ന്യൂസിലന്റ് എയർഫോഴ്സിലെ സിഖ് ലീഡർ വീഡിയോ സന്ദേശത്തിൽ പറയുന്നു. ‘ഞങ്ങളുടെ ആയോധനപാരമ്പര്യങ്ങൾ തുടരുന്നത് ഉറപ്പാക്കാനുള്ള ഈ ഉത്സവം ആഘോഷിക്കുന്നതിൽ വളരെ അധികം അഭിമാനം തോന്നു’ ബ്രിട്ടീഷ് ആർമിയിലെ സിഖ് ഉദ്യോഗസ്ഥർ പറയുന്നു.
സിഖുകാരുടെ പത്താമത്തെ ഗുരുവായ ഗുരു ഗോവിന്ദ് സിംഗ് ആരംഭിച്ച ഉത്സവമാണ് ഹോള മൊഹല്ല. ഹോളിയ്ക്ക് ശേഷം വരുന്ന ഈ ദിവസം സിഖ് വീരയോദ്ധാക്കളുടെ സ്മരണയെ സൂചിപ്പിക്കുന്ന ദിനമാണ്. സിഖുകാരിലെ ഒരു പ്രത്യേക വിഭാഗമായ നിഹാങ് സിഖുകാർ ഈ ആഘോഷത്തിന്റെ പേരിൽ പ്രസിദ്ധരാണ്. പരമ്പരാഗത ആയോധന കലകളുടെ പ്രദർശനത്തോടെയാണ് ആഘോഷങ്ങൾ ആരംഭിക്കുന്നത്. തുടർന്ന് സംഗീത, നൃത്ത പരിപാടികളും സംഘടിപ്പിക്കും.
