ന്യൂഡൽഹി: കശ്മീരി പണ്ഡിറ്റുകളുടെ കൂട്ടക്കൊലയുമായി ബന്ധപ്പെട്ട എല്ലാ കേസുകളും പുനരന്വേഷിക്കണമെന്ന് ആവശ്യപ്പെട്ട് രാഷ്ട്രപതി രാംനാഥ് കോവിന്ദിന് കത്ത്. കേസന്വേഷണത്തിന് പ്രത്യേക അന്വേഷണ സംഘത്തെ രൂപീകരിക്കണമെന്നും അതിനായി നിർദേശം നൽകണമെന്നും ആവശ്യപ്പെട്ട് അഭിഭാഷകനും സാമൂഹിക പ്രവർത്തകനുമായ വിനീത് ജിന്ദാലാണ് രാഷ്ട്രപതിക്ക് കത്തയച്ചത്.
1989-1990 കാലഘട്ടത്തിൽ കശ്മീരി പണ്ഡിറ്റുകൾ നേരിട്ട ക്രൂരതകൾ സമഗ്രമായി അന്വേഷിക്കണമെന്ന് കത്തിൽ പറയുന്നു. പ്രതികൂലമായ പല സാഹചര്യങ്ങളും കാരണം നിയമസംവിധാനത്തെ സമീപിക്കാൻ കഴിയാതെ പോയ ഇരകൾക്ക് നീതി ഉറപ്പാക്കുക എന്ന ലക്ഷ്യത്തോടെ പ്രവർത്തിക്കാൻ പ്രത്യേക അന്വേഷണ സംഘം വരണമെന്നാണ് ജിന്ദാൽ കത്തിൽ ആവശ്യപ്പെടുന്നത്.
33 വർഷം മുമ്പ് നടന്ന സിഖ് വിരുദ്ധ കലാപവുമായി ബന്ധപ്പെട്ട കാര്യങ്ങൾ പുനരന്വേഷിക്കാമെങ്കിൽ 27 വർഷം മുമ്പ് നടന്ന കശ്മീരി പണ്ഡിറ്റുകളുടെ കൂട്ടക്കൊല കേസുകളും പുനരന്വേഷിക്കാമെന്ന് അഭിഭാഷകൻ വാദിച്ചു. കലാപത്തിൽ ഇരയായവർ ഇപ്പോഴും ശാരീരികവും വൈകാരികവും മാനസികവുമായ ആഘാതത്തിലാണെന്നും കഴിഞ്ഞ കുറേ വർഷങ്ങളായി ഉപജീവനത്തിനായി പോരാടുന്നവരാണെന്നും ജിന്ദാൽ കത്തിൽ ചൂണ്ടിക്കാട്ടി.
വിവേക് അഗ്നിഹോത്രിയുടെ ദി കശ്മീർ ഫയൽസ് എന്ന ചിത്രം റിലീസ് ചെയ്തതിന് പിന്നാലെയാണ് വർഷങ്ങൾക്ക് മുമ്പ് നടന്ന കലാപം ഇപ്പോൾ വീണ്ടും ചർച്ചയായത്. കശ്മീരി പണ്ഡിറ്റുകളുടെ കൂട്ടക്കൊലയും പലായനവുമാണ് ചിത്രത്തിന്റെ പ്രമേയം.
