ആരാണ് സന്തോഷം ആഗ്രഹിക്കാത്തത് അല്ലേ.. ഏറ്റവുമധികം സന്തോഷിക്കുന്നത് ആരാണെന്നറിയാമോ.. ഏത് രാജ്യക്കാരാണെന്നറിയാമോ.. അഞ്ചാം തവണയും ഈ നേട്ടം സ്വന്തമാക്കിയിരിക്കുന്നത് ഒരേ രാജ്യം തന്നെയാണെന്നതാണ് പ്രത്യേകത..
യൂറോപ്യൻ രാജ്യമായ ഫിൻലാൻഡാണ് ലോകത്ത് ഏറ്റവുമധികം സന്തോഷമുള്ള രാജ്യമായി ഇത്തവണയും തിരഞ്ഞെടുക്കപ്പെട്ടത്. സാമ്പത്തികവും സാമൂഹികവുമായ വിലയിരുത്തലുകളുടെ അടിസ്ഥാനത്തിലാണ് ഫിൻലാൻഡ് ഈ നേട്ടം സ്വന്തമാക്കിയത്. സന്തോഷമുള്ള രാജ്യങ്ങളുടെ പട്ടികയിൽ വീണ്ടും ഒന്നാം സ്ഥാനത്തെത്തിയ ഫിൻലാൻഡ് ഈ നേട്ടം കരസ്ഥമാക്കിയത് എങ്ങനെയെന്ന് നോക്കാം..
ഐക്യരാഷ്‌ട്ര സഭയുടെ വാർഷിക സൂചിക പ്രകാരമാണ് ഏറ്റവും സന്തോഷം നിറഞ്ഞ രാജ്യത്തെ കണ്ടെത്തുന്നത്. ജനങ്ങളുടെ ക്ഷേമവും സാമ്പത്തിക സ്ഥിതിയും ഇതിനായി വിലയിരുത്തും. യുഎന്നിന്റെ ആറ് മാനദണ്ഡങ്ങൾ മുൻനിർത്തി സന്തോഷത്തിന്റെ അളവുകോൽ നിശ്ചയിക്കുന്നു. ആളോഹരി വരുമാനം, സാമൂഹ്യപിന്തുണ, ആയുർ ദൈർഘ്യം, സാമൂഹ്യസ്വാതന്ത്ര്യം, ഉദാരമനസ്‌കത, അഴിമതിവിരുദ്ധത, പൗരൻമാർ സ്വന്തം ജീവിതത്തെ എങ്ങനെ കാണുന്നു എന്നിങ്ങനെയുള്ള കാര്യങ്ങൾ ഒന്ന് മുതൽ പത്തുവരെയുള്ള സ്‌കോറിൽ മനസിലാക്കുന്നു. ഇതിലൂടെയാണ് പട്ടിക തയ്യാറാക്കുന്നത്.
റഷ്യ, നോർവെ, സ്വീഡൻ, എസ്‌തോണിയ എന്നീ രാജ്യങ്ങളുമായി അതിർത്തി പങ്കിടുന്ന വടക്കൻ യൂറോപ്പിലെ കൊച്ചുരാജ്യമാണ് ഫിൻലാൻഡ്. ഹെൽസിങ്കിയാണ് തലസ്ഥാന നഗരം. സ്‌കാൻഡിനേവിയൻ രാജ്യമായ ഇവിടെ അതികഠിനമായ തണുപ്പാണുള്ളത്. അഴിമതിയില്ലാത്ത സുതാര്യമായ ഭരണം, ആൺ-പെൺ, തൊഴിലാളി-മുതലാളി എന്നിങ്ങനെയുള്ള വ്യത്യാസമില്ലായ്ക, വിദ്യാഭ്യാസ-ക്ഷേമ പദ്ധതികളിൽ തുല്യത എന്നിവയാണ് ഫിൻലാൻഡിന്റെ പ്രത്യേകത. ഇതെല്ലാമാണ് കഴിഞ്ഞ അഞ്ച് വർഷമായി ഫിൻലാൻഡിന് സന്തുഷ്ട രാഷ്‌ട്രമെന്ന പദവി നൽകുന്നത്.
സാമൂഹിക പിന്തുണയും പരസ്പര സഹകരണവും സത്യസന്ധതയും ജനങ്ങളുടെ ക്ഷേമത്തിന് നിർണായകമാണെന്ന് വേൾഡ് ഹാപ്പിനസ് റിപ്പോർട്ട് തയ്യറാക്കിയ ജെഫ്രി സാച്ച്സ് ചൂണ്ടിക്കാട്ടുന്നു. സന്തോഷം നിറഞ്ഞ രാജ്യങ്ങളുടെ പട്ടികയിൽ ഏറ്റവും പിറകോട്ട് പോയ ചില രാജ്യങ്ങളുമുണ്ട്. ലെബനൻ, വെനിസ്വേല, അഫ്ഗാനിസ്ഥാൻ എന്നീ രാജ്യങ്ങളാണ് പട്ടികയിൽ പിന്നോട്ട് പോയിരിക്കുന്നത്. വികസിത രാജ്യമായ യുഎസ് 16-ാം സ്ഥാനത്താണ് ഉള്ളത്. തൊട്ടുപിന്നിൽ യുകെയുമുണ്ട്. അതേസമയം ഡെൻമാർക്കാണ് ഫിൻലാൻഡിന് തൊട്ടുപിറകിലെത്തി രണ്ടാം സ്ഥാനം നേടിയത്. ഐസ്‌ലാൻഡ്, സ്വിറ്റ്‌സർലാൻഡ്, നെതർലാൻഡ്‌സ് എന്നിവയാണ് തുടർന്നുള്ള സ്ഥാനക്കാർ.
