ചെന്നൈ: റൂബിക്സ് ക്യൂബ് പരിഹരിച്ച് റെക്കോർഡിട്ടവർ നിരവധിയാണ്. എന്നാൽ സൈക്കിളോടിച്ച് ക്യൂബ് സോൾവ് ചെയ്ത് റെക്കോർഡിട്ടവർ വിരളമായിരിക്കും. ഇത്തരത്തിൽ റൂബിക്സ് ക്യൂബ് സോൾവ് ചെയ്ത് ഗിന്നസ് റെക്കോർഡ് കരസ്ഥമാക്കി രാജ്യത്തിന് അഭിമാനമായിരിക്കുകയാണ് ചെന്നൈ സ്വദേശിയായ ഒരു മിടുമിടുക്കൻ.
ജയദർശൻ വെങ്കടേശൻ എന്ന കൊച്ചുമിടുക്കനാണ് സൈക്കിൾ ഓടിച്ചുകൊണ്ട് റൂബിക്സ് ക്യൂബ് പരിഹരിച്ച് ഗിന്നസിൽ ഇടം നേടിയത്. വെറും 14.32 സെക്കൻഡിനുള്ളിലായിരുന്നു ജയദർശന്റെ പ്രകടനം.
New record: Fastest time to solve a rotating puzzle cube whilst riding a bicycle – 14.32 seconds.
Jayadharshan Venkatesan from Chennai, India was steering, pedaling and solving this cube whilst keeping his balance 🚲 pic.twitter.com/KJ23A6a9X9
— Guinness World Records (@GWR) March 16, 2022
ജയദർശൻ സൈക്കിൾ ചവിട്ടിക്കൊണ്ട് റൂബിക്സ് ക്യൂബ് സോൾവ് ചെയ്യുന്ന വീഡിയോ ഗിന്നസ് അധികൃതർ തന്നെയാണ് സമൂഹമാദ്ധ്യമങ്ങളിൽ പങ്കുവെച്ചിരിക്കുന്നത്. ‘സ്പീഡ് ക്യൂബിംഗ്’ എന്ന വിഭാഗത്തിലാണ് ജയദർശന്റെ നേട്ടം ഉൾപ്പെടുത്തിയിരിക്കുന്നത്.
കഴിഞ്ഞ രണ്ട് വർഷമായി റെക്കോർഡ് നേട്ടത്തിനായുള്ള പരിശ്രമത്തിലായിരുന്നു ജയദർശൻ. ഒടുവിൽ പൂർണ ആത്മവിശ്വാസം നേടിയതിന് ശേഷമാണ് ഗിന്നസ് അധികൃതർക്ക് മുമ്പിൽ ജയദർശൻ പ്രകടനം കാഴ്ച വെച്ചത്.
