രാജ്ഞിയോടൊപ്പം ഭക്ഷണം കഴിക്കുകയായിരുന്ന മന്ത്രിയ്ക്ക് പെട്ടെന്നൊരു ആഗ്രഹം..തന്റെ ചീസിനൊപ്പം കഴിക്കാൻ എന്തെങ്കിലും വേണമെന്ന്. ഇതിനായി ബിസ്ക്കറ്റ് അന്വേഷിച്ച് പോയപ്പോൾ ഒരു പ്രത്യേക തരം ബിസ്ക്കറ്റ് അദ്ദേഹം കണ്ടെത്തി. അത് കണ്ടപ്പോൾ തന്നെ ഇഷ്ടപ്പെട്ട മന്ത്രി, ആരോടും ഒന്നും ചോദിക്കാതെ അതങ്ങ് അകത്താക്കി. എന്നാൽ, പിന്നീട് സംഭവിച്ചതാകട്ടെ ബഹുരസവും. മന്ത്രി സ്വാദോടെ കഴിച്ചത് രാജ്ഞിയുടെ നായയ്ക്ക് വാങ്ങിയ ബിസ്ക്കറ്റ് ആയിരുന്നു.
കേൾട്ടപ്പോൾ ഇത് വെറുമൊരു തമാശക്കഥയാണെന്ന് തോന്നിയെങ്കിൽ തെറ്റി. 2008ൽ ബ്രിട്ടനിലെ തൊഴിൽമന്ത്രി അലൻ ജോൺസണ് പറ്റിയ അമളിയാണിത്. വെയിൽസ് രാജകുമാരി ഡയാനയുടെ മരണത്തെക്കുറിച്ചുള്ള ദീർഘകാല അന്വേഷണം അവസാനിച്ച് അതിന്റെ സന്തോഷം ആഘോഷിക്കവെയാണ് അദ്ദേഹത്തിന് ഈ അമളിപറ്റിയത്.
ഏവരും ഭക്ഷണം കഴിക്കുന്ന സമയത്ത് അലൻ അവിടെ നിന്ന് പട്ടിയുടെ ബിസ്ക്കറ്റ് കഴിക്കുകയും ശേഷം, ഭക്ഷണത്തെ കുറിച്ചുള്ള അഭിപ്രായങ്ങൾ പങ്കുവെച്ചപ്പോൾ ബിസ്ക്കറ്റിന്റെ കാര്യം സൂചിപ്പിക്കുകയും ചെയ്തു. അപ്പോഴാണ് അദ്ദേഹത്തിന്റെ സഹപ്രവർത്തകർ അത് രാജ്ഞിയുടെ നായയ്ക്ക് നൽകുന്ന ബിസ്ക്കറ്റ് ആണെന്ന കാര്യം വെളിപ്പെടുത്തിയത്. കഴിഞ്ഞ ദിവസം ബ്രിട്ടൻ ആസ്ഥാനമായ മാസികയിലാണ് ഇക്കാര്യം പ്രസിദ്ധീകരിച്ചത്.
