പനാജി : കളിക്കളത്തിലേക്ക് ഇറങ്ങുമ്പോൾ തനിക്ക് ഏറ്റവും ഹരം ലഭിക്കുന്ന നിമിഷങ്ങൾ പങ്കുവെച്ച് കേരള ബ്ലാസ്റ്റേഴ്സ് ക്യാപ്റ്റൻ അഡ്രിയാൻ ലൂണ. ആരാധകരിൽ നിന്നുമുണ്ടാകുന്ന ആവേശോജ്വലമായ പ്രോത്സാഹനമാണ് തനിക്ക് ഹരം പകരുന്നത് എന്ന് ലൂണ പറഞ്ഞു. ഐഎസ്എൽ മത്സരം ആരംഭിക്കുന്നതിന് മുൻപ് സ്റ്റേഡിയത്തിനുള്ളിലെ ബിഗ് സ്ക്രീനിൽ കളിക്കളത്തിലേക്ക് ഇറങ്ങുന്ന താരങ്ങളുടെ പേരും ഫോട്ടോയും കാണിക്കും.
ഐഎസ്എല്ലിന്റെ ആദ്യ സീസൺ മുതൽ തുടർന്ന് വരുന്ന രീതിയാണിത്. ഇങ്ങനെ എഴുതിക്കാണിക്കുമ്പോൾ ഗാലറിയിലുള്ള ആരാധകർ ആർപ്പ് വിളികളോടെയാണ് താരങ്ങളെ വരവേൽക്കുക. കേരള ബ്ലാസ്റ്റേഴ്സ് ആരാധകർ തന്നെയാണ് ഇതിലും മുൻപന്തിയിലുള്ളത്. ഈ നിമിഷങ്ങളാണ് തനിക്ക് ഏറ്റവും ആവേശമുയർത്തിയത് എന്നാണ് മത്സരത്തിന് മുമ്പ് ഐഎസ്എല്ലിന് നൽകിയ അഭിമുഖത്തിൽ ലൂണ പറഞ്ഞു.
തന്റെ പേര് സ്ക്രീനിൽ തെളിഞ്ഞപ്പോൾ ആരാധകർ ഗാലറിയിൽ നടത്തിയ ആഘോഷം താൻ ഒരിക്കലും മറക്കില്ലെന്ന് ലൂണ വ്യക്തമാക്കി. ഫൈനലിന് മുമ്പ് സമ്മർദ്ദമൊന്നുമില്ലെന്നും മത്സരത്തിനായി നല്ല രീതിയിൽ തന്നെ തയ്യാറെടുത്തിട്ടുണ്ടെന്നും ലൂണ പറഞ്ഞു. ഇത്തവണത്തെ കപ്പ് ബ്ലാസ്റ്റേഴ്സ് തന്നെ ഉയർത്തുമെന്നും താരങ്ങൾ മികച്ച ആത്മവിശ്വാസത്തിലാണെന്നും ലൂണ കൂട്ടിച്ചേർത്തു.
