ന്യൂഡൽഹി: ഡൽഹിയിൽ നിന്ന് ഖത്തറിലേക്ക് പറന്ന ഖത്തർ എയർവേയ്‌സ് വിമാനത്തിന് സാങ്കേതിക തകരാർ. സംഭവത്തെ തുടർന്ന് വിമാനം പാകിസ്താനിലേക്ക് വഴിതിരിച്ചുവിട്ടു. കറാച്ചിയിലെ ജിന്ന അന്താരാഷ്‌ട്ര വിമാനത്താവളത്തിലാണ്
വിമാനം സുരക്ഷിതമായി ലാൻഡ് ചെയ്തത്.
283 യാത്രക്കാർ വിമാനത്തിലുണ്ടായിരുന്നതായി പാകിസ്താൻ സിവിൽ ഏവിയേഷൻ അതോറിറ്റി വക്താവ് സെയ്ഫുർ റഹ്മാൻ അറിയിച്ചു. ഖത്തർ എയർവെയ്‌സിന്റെ ക്യുആർ 579 വിമാനത്തിനാണ് തകരാർ ഉണ്ടായത്. യാത്രയ്‌ക്കിടെ കാർഗോ സാധനങ്ങൾ സൂക്ഷിക്കുന്ന ഭാഗത്ത് നിന്നും പുക കണ്ടെത്തുകയായിരുന്നു.
യാത്രക്കാരെല്ലാം സുരക്ഷിതരാണെന്നും ഇവരെ പ്രത്യേക വിമാനത്തിൽ ഖത്തറിലേക്ക് യാത്ര അയച്ചതായും ഖത്തർ എയർവെയ്‌സ് അറിയിച്ചു. പ്രാദേശിക സമയം വൈകിട്ട് 4.15 ന് വിമാനം ഖത്തറിൽ ലാൻഡ് ചെയ്യുമെന്നും കമ്പനി വ്യക്തമാക്കി.
യാത്രക്കാർക്കുണ്ടായ ബുദ്ധിമുട്ടിൽ ക്ഷമ ചോദിക്കുന്നതായും പ്രഭാതഭക്ഷണവും മറ്റ് വിശ്രമ സൗകര്യവും ഒരുക്കിയിരുന്നതായും കമ്പനി പറഞ്ഞു. സംഭവത്തെക്കുറിച്ച് അന്വേഷിക്കുമെന്നും ഖത്തർ എയർവെയ്‌സ് വ്യക്തമാക്കിയിട്ടുണ്ട്.
