ന്യൂഡൽഹി:പ്രമുഖ നർത്തകി നീന പ്രസാദിന്റെ മോഹിനിയാട്ടക്കച്ചേരി തടഞ്ഞുവച്ച പോലീസ് നടപടി അപലപനീയമാണെന്ന് സംസ്കാർ ഭാരതി ദേശീയ സംഘടന കാര്യദർശി അഭിജിത്ത് ഗോഖലെ.
കേരളത്തിലെ പാലക്കാട് മോയൻ എൽപി സ്കൂൾ അങ്കണത്തിൽ നടന്ന മോഹിനിയാട്ടക്കച്ചേരി ശബ്ദമലിനീകരണത്തിന്റെ പേരിൽ പോലീസ് തടഞ്ഞത് സംബന്ധിച്ച് നീന പ്രസാദ് ഫേസ് ബുക്കിൽ എഴുതിയ കുറിപ്പിനോട് പ്രതികരിച്ചാണ് അഭിജിത്ത് ഗോഖലെയുടെ പ്രസ്താവന.
സ്കൂളിന് സമീപം താമസിക്കുന്ന ജഡ്ജ് കലാം പാഷയുടെ നിർദ്ദേശപ്രകാരമാണ് നൃത്തപരിപാടി പോലീസ് തടഞ്ഞത്. ദൈവത്തിന്റെ സ്വന്തം നാട്ടിലാണ് ഭഗവാൻ കൃഷ്ണനെ സ്തുതിച്ചുകൊണ്ടുള്ള മോഹിനിയാട്ടം അവതരിപ്പിക്കുന്നതിന് വിലക്കേർപ്പെടുത്തിയതെന്ന് ഓർക്കണമെന്ന് അദ്ദേഹം പറഞ്ഞു.
സ്വാതന്ത്ര്യം നേടി മുക്കാൽ നൂറ്റാണ്ട് പിന്നിട്ടിട്ടും കൊളോണിയൽ മനസ്ഥിതിയിൽ നിന്ന് ചിലർ മുക്തരായിട്ടില്ലെന്നതിന്റെ തെളിവാണിത്. കലാപ്രതിഭകളെ അവഹേളിക്കുന്ന ഇത്തരം നടപടികൾ നാടിന് അപമാനകരമാണെന്നും അദ്ദേഹം പ്രസ്താവനയിൽ പറഞ്ഞു.
Comments