ഇന്ത്യൻ വംശജനായ അമേരിക്കൻ വ്യോമസേനയിലെ ഉദ്യേഗസ്ഥൻ ദർശൻ ഷായ്ക്ക് യൂണിഫോമിലായിരിക്കുമ്പോഴും കുങ്കുമ തിലകം അണിയാൻ അനുമതി. കഴിഞ്ഞ ഫെബ്രുവരി 22നാണ് കുങ്കുമ തിലകം അണിയാൻ ദർശന് ഔദ്യോഗിക അനുമതി ലഭിച്ചത്. വ്യോമിങ്ങിലെ എഫ്ഇ വാറൻ എയർഫോഴ്‌സ് ബേസിലെ എയർമാനാണ് ഷാ.
അടിസ്ഥാന സൈനിക പരിശീലന(ബിഎംടി) സമയത്ത് തന്നെ തിലകം അണിയാൻ ഷാ അനുമതി തേടിയിരുന്നു. എന്നാൽ ടെക് സ്‌കൂൾ വരെയും തുടർന്ന് ആദ്യ ഡ്യൂട്ടി സ്റ്റേഷനിൽ എത്തുന്നത് വരെയും കാത്തിരിക്കാനായിരുന്നു അദ്ദേഹത്തിന് ലഭിച്ച നിർദ്ദേശം. ഇപ്പോൾ, ഡ്യൂട്ടയിൽ തിലകം ധരിക്കാൻ അനുമതി ലഭിച്ചതിൽ സന്തോഷമുണ്ടെന്ന് ഷാ പ്രതികരിച്ചു.
‘ടെക്‌സാസ്, കാലിഫോർണിയ, ന്യൂജേഴ്‌സി, ന്യൂയോർക്ക് എന്നിവിടങ്ങളിൽ നിന്നുള്ള സുഹൃത്തുക്കൾ സന്ദേശമയക്കുന്നുണ്ട്. ഇത് പുതിയ കാര്യമാണ്. അവർ മുൻപ് കേട്ടിട്ടില്ലാത്തതും, അസാധ്യമാണെന്ന് കരുതിയതുമാണ്. പക്ഷേ അത് സംഭവിച്ചു’ ഷാ പറഞ്ഞു.
മിനസോട്ടയിലെ ഈഡൻ പ്രയർ സ്വദേശിയാണ് ഷാ. ഗുജറാത്തിലെ ബോചസൻവാസി ശ്രീ അക്ഷര പുരുഷോത്തം സ്വാമിനാരായൺ സൻസ്ത വിശ്വാസികളാണ് ഷായുടെ കുടുംബം. ഈ വിഭാഗത്തിന്റെ വിശ്വാസമനുസരിച്ച്, നെറ്റിയിൽ ഒരു ഓറഞ്ച് U-ആകൃതിയിലുള്ള കുറിയും, കുങ്കുമ തിലകവും ധരിക്കണം.
