തിരുവനന്തപുരം: സംസ്ഥാനത്തെ വിവിധ വകുപ്പുകളിൽ പ്രധാനമായ റവന്യൂവകുപ്പ് അഴിമതിരഹിതമാക്കുക എന്ന ലക്ഷ്യമിട്ട് പുതിയ സ്ക്വാഡിന് സർക്കാർ രൂപം നൽകി. പൊതുജനങ്ങളുമായി അടുത്തുബന്ധപ്പെട്ടു പ്രവർത്തിക്കുന്ന റവന്യൂവകുപ്പിൽ സ്തുത്യർഹമായ സേവനം ഉറപ്പാക്കുകയും സ്ക്വാഡ് ലക്ഷ്യമിടുന്നു.
റവന്യൂ വരുമാനം, ഭൂവിനിയോഗം, ഭൂസംരക്ഷണം, വിതരണം, ദുരന്തനിവാരണം, പട്ടയവിതരണം വിവിധ സർട്ടിഫിക്കറ്റുകൾ തുടങ്ങിയ സേവനങ്ങൾ നൽകി വരുന്ന റവന്യൂവകുപ്പിൽ കൈക്കൂലിയും അഴിമതിയും വ്യാപകമാണെന്ന് പരാതി ലഭിച്ചതോടെയാണ് സ്ക്വാഡ് രൂപീകരിച്ചത്. റവന്യുവകുപ്പിന്റെ വിവിധ സേവനങ്ങൾ നിഷേധിക്കുന്നതായി പരാതി ലഭിച്ചാൽ ഇക്കാര്യം സർക്കാരിന് വേണ്ടി നേരിട്ട് പരിശോധിക്കുകയാണ് സ്ക്വാഡ് ചെയ്യുന്നത്.
പരാതിയുടെ സ്വഭാവമനുസരിച്ച് റവന്യൂവകുപ്പിലെ വിവിധ സെക്ഷനുകളിലെ ഉദ്യോഗസ്ഥരെ ഉൾപ്പെടുത്തി ഇൻസ്പെക്ഷൻ സ്ക്വാഡ് രൂപീകരിക്കും. പരിശോധന സമയത്ത് സ്ക്വാഡിന് അതതു ജില്ലാകലക്ടർ എല്ലാസേവനങ്ങളും നൽകണം. പരിശോധന റിപ്പോർട്ടിലെ നിർദ്ദേശമനുസരിച്ച് അതതുവിഷയം കൈകാര്യം ചെയ്യുന്ന സെക്ഷനുകളിൽ ശേഖരിച്ച് സർക്കാർ തുടർനടപടി സ്വീകരിക്കും.
