ന്യൂഡൽഹി: മനുഷ്യരോട് ഏറ്റവും സൗഹൃദപരമായി പെരുമാറുന്ന മൃഗങ്ങളിലൊന്നാണ് നായ. സ്‌നേഹം അൽപം കൊടുത്താൽ ഒത്തിരിയായി തിരിച്ചുതരുന്ന വർഗങ്ങളെന്നും പട്ടികളെ വിശേഷിപ്പിക്കാറുണ്ട്. ഈ ജീവി വവർഗം പലപ്പോഴും മനുഷ്യരുടെ ജീവൻ രക്ഷിച്ച കഥകളും നാം കണ്ടിട്ടുണ്ട്. അത്തരമൊരു വീഡിയോ ദൃശ്യമാണ് ഇപ്പോൾ സമൂഹമാദ്ധ്യമങ്ങളിൽ വൈറലാകുന്നത്.
വീട്ടുമുറ്റത്ത് കളിക്കുന്ന രണ്ട് കുട്ടികളും ഒരു ജെർമ്മൻഷെപ്പേഡ് നായയുമാണ് വീഡിയോയിലെ താരങ്ങൾ. കുട്ടികൾ ബോൾ തട്ടി കളിച്ചുകൊണ്ടിരിക്കവെ മുറ്റത്ത് സ്ഥിതിചെയ്യുന്ന കൊച്ചുകുളത്തിലേക്ക് ബോൾ വീണുപോയി.. ഇതുകണ്ട കുട്ടികളിലൊരാൾ മാതാപിതാക്കളെ വിവരമറിയിക്കാനെന്നോണം വീടിന്റെ അകത്തേക്ക് പോകുന്നുണ്ട്. എന്നാൽ രണ്ടാമത്തെ കുട്ടി കുളത്തിൽ വീണ ബോളെടുക്കാൻ ശ്രമിക്കുകയാണ്. ഇതെല്ലാം കണ്ടുകൊണ്ട് കിടക്കുകയായിരുന്ന വളർത്തുനായ കുളത്തിനടുത്ത് നിൽക്കുന്ന കുട്ടിയുടെ സമീപത്തേക്ക് ഓടിച്ചെന്നു..
തുടർന്ന് കുളത്തിൽ നിന്നും അപകടകരമാം വിധം ബോളെടുക്കാൻ ശ്രമിക്കുന്ന കുട്ടിയുടെ വസ്ത്രത്തിൽ കടിച്ചുപിടിച്ച് പിറകിലോട്ട് മാറ്റി. അതുചെയ്യരുത് എന്ന് നിർദേശം നൽകുന്നതിന് തുല്യമായിരുന്നു നായയുടെ പ്രവൃത്തി. അതിന് പിന്നാലെ വീടിന് സമീപം ഇരിക്കുന്ന ഒരു വടി വായകൊണ്ട് കടിച്ച് പിടിച്ച് നായ എടുത്തുകൊണ്ടുവന്നു. ആ വടിയുടെ അറ്റത്ത് ഒരു കൊച്ചുവല ഘടിപ്പിച്ചിരുന്നു.
വല ഘടിപ്പിച്ചിരിക്കുന്ന വടികൊണ്ട് വെള്ളത്തിൽ വീണ ബോളെടുത്ത് വളർത്തുനായ കുഞ്ഞിന് നൽകി. കുട്ടി സ്‌നേഹത്തോടെ നായയെ തലോടുന്നതോട് കൂടിയാണ് വീഡിയോ ദൃശ്യങ്ങൾ അവസാനിക്കുന്നത്. 47 സെക്കൻഡ് മാത്രം ദൈർഘ്യമുള്ള ഈ വീഡിയോ യൂട്യൂബിലാണ് വ്യാപകമായി പ്രചരിച്ചത്. നായയുടെ ബുദ്ധിപരമായ പ്രവൃത്തിക്ക് സോഷ്യൽമീഡിയയിൽ ആശംസാപ്രവാഹമാണ്.
https://youtu.be/piNQbo1-aMM
