വ്യത്യസ്തതകൾ ആഗ്രഹിക്കുന്നവരാണ് മിക്ക ആളുകളും. ശരീരമാസകലം ടാറ്റൂ അടിക്കുന്നവരേയും സ്വർണ്ണ പല്ല് വെച്ചു പിടിപ്പിക്കുന്നവരേയും എന്തിനേറെ പ്ലാസ്റ്റിക് സർജറിയിലൂടെ രൂപം തന്നെ മാറ്റി മറിക്കുന്നവരെ നമ്മൾ കണ്ടിട്ടുണ്ട്. മറ്റുള്ളവരിൽ നിന്നും വേറിട്ട് നിൽക്കാൻ വേണ്ടി ചിലർ കാട്ടിക്കൂട്ടുന്ന പ്രഹസനങ്ങൾ കാണുമ്പോൾ നമ്മൾ തന്നെ തലയിൽ കൈവെച്ച് പോകും. അത്തരത്തിലൊരാളെ കുറിച്ചാണ് പറഞ്ഞു വരുന്നത്. മെക്സിക്കൻ റാപ്പർ ഡാൻ സൂർ വ്യത്യസ്തനാകാൻ വേണ്ടി തലമുടിയ്ക്ക് പകരം സ്വർണ്ണ ചെയ്നുകളാണ് ശസ്ത്രക്രിയയിലൂടെ സ്ഥാപിച്ചത്.
24കാരനാണ് ഡാൻ സൂർ. ശസ്ത്രക്രിയയിലൂടെ അദ്ദേഹം തലയോട്ടിയിൽ സ്വർണ്ണ ചെയിനുകൾ തുന്നിച്ചേർത്തു. കഴിഞ്ഞ വർഷം ഏപ്രിലിലാണ് അദ്ദേഹം ശസ്ത്രക്രിയയ്ക്ക് വിധേയനായത്. അതിനുശേഷം അദ്ദേഹത്തിന്റെ ഇൻസ്റ്റാഗ്രാം പേജിൽ തന്റെ ഫോളോവേഴ്സിനായി ‘സ്വർണമുടി’ -യുടെ ചിത്രങ്ങളും വീഡിയോകളും അദ്ദേഹം പങ്കുവച്ചു. ഫോളോവേഴ്സിന്റെ എണ്ണം ഇരട്ടിയായതോടെ തന്റെ പല്ലുകളും സ്വർണ്ണമാക്കാൻ ഡാൻ കൂർ തീരുമാനിച്ചു. പിന്നാലെ പല്ലുകളിൽ സ്വർണ്ണ പ്ലേറ്റുകളും തുന്നിച്ചേർത്തു.
തലയോട്ടിയിൽ സ്വർണ ചെയിനുകൾ പിടിപ്പിച്ച ചരിത്രത്തിലെ ആദ്യത്തെ റാപ്പറാണ് താനെന്ന് ഡാൻ കൂർ അവകാശപ്പെടുന്നു. അദ്ദേഹം പങ്കുവച്ച ഒരു വീഡിയോയിൽ, പിസ്സ കഴിക്കുന്നതിനിടയിൽ കൈയിൽ സ്വർണക്കട്ടകൾ പിടിച്ചും, തന്റെ സ്വർണമുടി കാണിച്ചും ഡാൻ ആളുകളെ രസിപ്പിക്കുന്നത് കാണാം. വീഡിയോയെല്ലാം നിരവധി പേരാണ് കാണുന്നത്. ഡാനിന്റെ വീഡിയോക്കും ഡാനിനും നിരവധി ആരാധകരാണുള്ളത്. വ്യത്യസ്തമായി എന്തെങ്കിലും ചെയ്യാൻ ആഗ്രഹിച്ചു എന്നതാണ് തലയിൽ സ്വർണ്ണ ചെയിൻ സ്ഥാപിക്കാൻ കാരണമെന്നാണ് ഡാൻ പറയുന്നത്.
തന്നെ കണ്ട് ആരും ഇത് അനുകരിക്കരുതെന്നും ഡാൻ പറയുന്നുണ്ട്. ടിക്ക് ടോക്കിൽ മാത്രം അദ്ദേഹത്തിന് നാല് മില്യൺ ഫോളോവേഴ്സ് ഉണ്ട്. നെറ്റിയിലേക്ക് തൂങ്ങിക്കിടക്കുന്ന സ്വർണ്ണ ചങ്ങലകളും കഴുത്തിൽ വലിപ്പമേറിയ സ്വർണ്ണമാലകളും കയ്യിൽസ്വർണ്ണ വളകളും അണിഞ്ഞ് പെട്ടെന്ന് ഒരു ദിവസം സർവ്വാഭരണഭൂഷിതനായി ഡാൻ സൂർ പ്രത്യക്ഷപ്പെടുകയായിരുന്നു. പിന്നാലെ വീഡിയോയും വൈറലായി. നിരവധി പേർ ഡാൻ സൂറിനെ വിമർശിച്ചും എത്തിയിരുന്നു.
തലയോട്ടി തുറന്നുള്ള ശസ്ത്രക്രിയയാണ് ഡാൻ സൂർ നടത്തിയത്. തലയോട്ടിയിൽ ഇംപ്ലാന്റ് ചെയ്തത് യഥാർത്ഥ സ്വർണ്ണമാണെന്നും പ്ലാസ്റ്റിക്ക് അല്ലെന്നും ഡാൻ പറയുന്നുണ്ട്. ഇത്തരത്തിലുള്ള ശസ്ത്രക്രിയകൾ അപകടകരമാണെന്ന് പ്ലാസ്റ്റിക് സർജന്മാർ പറയുന്നുണ്ട്. ശസ്ത്രക്രിയയിലൂടെ തലയോട്ടിയിൽ അണുബാധ ഉണ്ടാകാമെന്നും മരണം വരെ സംഭവിക്കാമെന്നുമാണ് ഡോക്ടർമാരുടെ അഭിപ്രായം.
വ്യത്യസ്തമാകാൻ ശരീരത്തിൽ എന്തും ചെയ്യുന്ന പ്രവണത പൊതുവെ വ്യാപകമാണ്. എല്ലാ രാജ്യങ്ങളിലും ഈ രീതി അവലംബിക്കുന്നവരുണ്ട്. എങ്കിലും സ്വാഭാവികമായ ശരീര ഘടനയിൽ ലോഹങ്ങളും മറ്റും പിടിപ്പിക്കുന്നത് ഒട്ടും നല്ല കാര്യമല്ല. ശരീരത്തെ ദോഷകരമായി ബാധിക്കുമെന്ന് മാത്രമല്ല പൊതു സമൂഹത്തിന് നല്ലൊരു സന്ദേശവുമല്ല അത് നൽകുന്നത്. വ്യക്തിപരമായ ഇഷ്ടാനിഷ്ടങ്ങളാണെന്ന് പറയാമെങ്കിലും ഡാൻ സൂറിനെപ്പോലെയുള്ളവർ ഒരിക്കലും അനുകരിക്കപ്പെടേണ്ടവരല്ല.
