തിരുവനന്തപുരം: ദേശീയ പണിമുടക്കിൽ നിന്ന് ഒഴിവാക്കി തരണമെന്ന തിയേറ്റർ ഉടമകളുടെ ആവശ്യം തള്ളി സംയുക്ത തൊഴിലാളി യൂണിയൻ. 48 മണിക്കൂർ ദേശീയ പണിമുടക്കിൽ നിന്ന് സിനിമ മേഖലയ്‌ക്ക് മാത്രമായി ഇളവ് നൽകാൻ കഴിയില്ലെന്നാണ് തൊഴിലാളി യൂണിയന്റെ നിലപാട്.
രണ്ട് ദിവസമായി നടക്കാനിരിക്കുന്ന ഭാരത്ബന്ദിൽ നിന്ന് സംസ്ഥാനത്തെ തിയേറ്ററുകളെ ഒഴിവാക്കണമെന്ന് ഫിയോക് ആവശ്യപ്പെട്ടിരുന്നു. മഹാമാരിക്ക് ശേഷം തിയേറ്റർ വ്യവസായം പുനരാരംഭിച്ചിട്ടേയുള്ളൂവെന്നും പ്രതിസന്ധിയിൽ നിന്ന് കരകയറാൻ ശ്രമിക്കുന്ന വേളയിൽ പണിമുടക്ക് പ്രയാസമാകുമെന്നും തിയേറ്റർ ഉടമകളുടെ സംഘടനയായ ഫിയോക് ചൂണ്ടിക്കാട്ടി.
പണിമുടക്കിൽ നിന്ന് ഒഴിവാക്കി ഷൂട്ടിങ് നടത്താൻ അനുമതി നൽകണമെന്ന് ചലച്ചിത്ര സംഘടനകളും ആവശ്യപ്പെട്ടിരുന്നു. എന്നാൽ സമരത്തെക്കുറിച്ച് എല്ലാവരെയും ബോധ്യപ്പെടുത്തി മുന്നോട്ടു പോകുകയാണെന്നും പണിമുടക്ക് ഒരു വർഷം മുമ്പേ പ്രഖ്യാപിച്ചതാണെന്നുമാണ് തൊഴിലാളി യൂണിയൻ നേതാക്കളുടെ പ്രതികരണം.
