വിവാഹ വീഡിയോയും അതിന് മുൻപുള്ള സേവ് ദ ഡേറ്റും എല്ലാം വ്യത്യസ്തമായി അവതരിപ്പിക്കുന്നവരാണ് പുതിയ തലമുറ. വിവാഹ ഡേറ്റ് തീരുമാനിച്ച അന്ന് മുതൽ എങ്ങനെ സേവ് ദ ഡേറ്റ് വ്യത്യസ്തമാക്കണം എന്ന് ചിന്തിച്ചിരിക്കുന്നവരാകും ഏറെയും. അത്തരത്തിൽ വ്യത്യസ്തമായൊരു വീഡിയോ പ്ലാൻ ചെയ്തവർക്ക് ലഭിച്ച അതിലും വ്യത്യസ്തമായൊരു വീഡിയോ സോഷ്യൽ മീഡിയയിൽ വൈറലായിരിക്കുകയാണ്.
യുവതിയെ വെള്ളത്തിൽ നിന്നും എടുത്തുയർത്തുന്ന യുവാവിനെയാണ് വീഡിയോയിൽ കാണാനാവുക. എന്നാൽ പ്രതീക്ഷിക്കാതെ കാര്യങ്ങൾ കൈവിട്ട് പോവുകയായിരുന്നു. വധുവിനെ എടുത്തുയർത്തുന്നതിനിടെ വരന്റെ ബാലൻസ് തെറ്റുന്നതാണ് പിന്നീട് കണ്ടത്. പെട്ടന്ന് പുഴയിലേക്ക് ഇരുവരും മറിയുകയായിരുന്നു. വെള്ളത്തിലേക്ക് മറിയുന്ന യുവാവിനെ രക്ഷപെടുത്താൻ എന്ത് ചെയ്യണമെന്ന് അറിയാതെ അമ്പരക്കുകയാണ് യുവതിയും.
രണ്ട് പേരും പരിക്കുകൾ ഒന്നും തന്നെ ഇല്ലാതെ രക്ഷപെട്ടതായാണ് വിവരം. കഴിഞ്ഞ കുറച്ച് ദിവസമായി ഈ വീഡിയോ സോഷ്യൽ മീഡിയയിൽ വൈറലാകുന്നുണ്ട്. വീഡിയോ എവിടെ നിന്നുള്ളതാണെന്നോ ആരാണ് വീഡിയോയിൽ ഉള്ളതെന്നോ വ്യക്തമല്ല. വീഡിയോ എടുക്കുന്നവരും അത് ചിത്രീകരിക്കുന്നവരും മുൻകരുതലുകൾ ഇല്ലാതെ ഇറങ്ങി തിരിക്കരുതെന്നാണ് ഈ വീഡിയോ നൽകുന്ന സൂചന.
2020ൽ ഒരു പ്രീ-വെഡിങ് ഫോട്ടോഷൂട്ടിൽ വരനും വധുവും മരണപ്പെട്ടിരുന്നു. ദാരുണമായ അപകടത്തിൽ, കാവേരി നദിയിൽ കുട്ടവള്ളം മറിഞ്ഞ് ചന്ദ്രു (28), ശശികല (20) എന്നിവരാണ് മരിച്ചത്. നവംബർ 22നായിരുന്നു ഇവരുടെ വിവാഹം നിശ്ചയിച്ചിരുന്നത്. തലക്കാടിന് സമീപം ഇരുവരും ഫോട്ടോഷൂട്ടിന് വേണ്ടി നദിയിലേക്കിറങ്ങിയതിന് ശേഷമാണ് അപകടമുണ്ടായത്.
