കോഴിക്കോട്: രാജ്യവ്യാപക പണിമുടക്കിൽ സംസ്ഥാനത്ത് പരക്കെ ആക്രമണങ്ങളാണ് റിപ്പോർട്ട് ചെയ്തത്. സമരാനുകൂലുകൾ ഹർത്താലിന് സമാനമായ അന്തരീക്ഷമായിരുന്നു കേരളത്തിൽ സൃഷ്ടിച്ചത്. കടതുറന്നയാളുകൾക്കെതിരെയും വാഹനത്തിൽ സഞ്ചരിച്ചവർക്കെതിരെയും ആക്രമണം നടന്നു. തിരുവനന്തപുരത്ത് തടഞ്ഞുനിർത്തലും ഭീഷണികളും ഉയർന്നതായി റിപ്പോർട്ടുകൾ പുറത്തുവന്നു.
ഇതിനിടെയാണ് കൊയിലാണ്ടിയിൽ കട തുറന്ന വ്യാപാരിക്കെതിരെ സമരാനുകൂലികളുടെ ആക്രമണമുണ്ടായത്. സമരാനുകൂലുകൾ വ്യാപാരിയുടെ ദേഹത്ത് നായ്ക്കുരുണ പൊടി വിതറിയെന്നാണ് ആരോപണം. വ്യാപാരി വ്യവസായി ഏകോപന സമിതിയുടെ യൂണിറ്റ് പ്രസിഡന്റ് കെ.പി ശ്രീധരന് നേരെയാണ് ആക്രമണമുണ്ടായത്. നിലവിൽ ഇദ്ദേഹം ആശുപത്രിയിൽ ചികിത്സയിലാണ്.
ഇതോടെ സംഭവത്തിൽ പ്രതിഷേധവുമായി വ്യാപാരി വ്യവസായി ഏകോപന സമിതി രംഗത്തെത്തി. കട തുറന്ന വ്യാപാരിയുടെ ദേഹത്ത് നായ്ക്കുരുണ പ്രയോഗം നടത്തിയത് പരിഷ്കൃത സമൂഹത്തിന് യോജിക്കുന്നതല്ലെന്നും തുറക്കുന്ന സ്ഥാപനങ്ങൾക്ക് സംരക്ഷണം നൽകണമെന്ന ഉത്തരവുണ്ടായിട്ടും പോലീസ് സംരക്ഷണം ലഭിക്കാതിരുന്നത് ഗുരുതര വീഴ്ചയാണെന്നും വ്യാപാരി വ്യവസായി ഏകോപന സമിതി പറഞ്ഞു. അക്രമത്തിന് പിന്നിലുള്ള സമരാനുകൂലികളെ അറസ്റ്റ് ചെയ്യണമെന്നാണ് സമിതിയുടെ ആവശ്യം.
Comments