തിരുവനന്തപുരം: സർക്കാർ ജീവനക്കാരുടെ പണിമുടക്ക് തടഞ്ഞ ഹൈക്കോടതി വിധി വന്ന പശ്ചാത്തലത്തിൽ ഡയസ്നോൺ പ്രഖ്യാപിച്ച് സർക്കാർ. ഇതോടെ സർക്കാർ ജീവനക്കാരെല്ലാവരും നാളെ ജോലിയിൽ പ്രവേശിക്കണം. അവശ്യ സാഹചര്യത്തിലല്ലാതെ നാളെയാർക്കും അവധി നൽകുന്നതല്ലെന്ന് ചീഫ് സെക്രട്ടറിയുടെ ഉത്തരവിൽ വ്യക്തമാക്കുന്നു.
സർക്കാർ ജീവനക്കാർക്ക് പണിമുടക്കാൻ കഴിയില്ലെന്നും ഇത്തരം സാഹചര്യത്തിൽ സർക്കാർ നോക്കി നിൽക്കരുതെന്നും ഹൈക്കോടതി നിർദേശിച്ചിരുന്നു. പണിമുടക്ക് നിയമവിരുദ്ധമാണെന്നും ഹൈക്കോടതി വ്യക്തമാക്കി. ഇതുവരെ ഡയസ്നോൺ പ്രഖ്യാപിക്കാതിരുന്ന നടപടിയിലും കോടതി അതൃപ്തി രേഖപ്പെടുത്തി. തിരുവനന്തപുരം സ്വദേശിയായ അഭിഭാഷകൻ സമർപ്പിച്ച ഹർജിയിലാണ് ഹൈക്കോടതിയുടെ ഇടപെടൽ.
ചീഫ് ജസ്റ്റിസ് അദ്ധ്യക്ഷനായ ബെഞ്ചാണ് ഉത്തരവ് ഇറക്കിയത്. പണിമുടക്കുന്ന സർക്കാർ ജീവനക്കാർക്ക് ശമ്പളത്തോടെയുള്ള അവധി നൽകാനാണ് സർക്കാരിന്റെ നീക്കമെന്നും ഡയസ്നോൺ പ്രഖ്യാപിക്കാൻ സർക്കാരിന് നിർദ്ദേശം നൽകണമെന്നും ഹർജിയിൽ വ്യക്തമാക്കിയിരുന്നു.
