തിരുവനന്തപുരം: ഹൈക്കോടതിയെ പേടിച്ച് പണിമുടക്കിൽ നിന്നും പിന്മാറില്ലെന്ന് സിഐടിയു സംസ്ഥാന പ്രസിഡന്റും സിപിഐഎം തിരുവനന്തപുരം ജില്ലാ സെക്രട്ടറിയുമായ ആനത്തലവട്ടം ആനന്ദൻ. പണിമുടക്കേണ്ടെന്ന് ഹൈക്കോടതി പറഞ്ഞാൽ ആരെങ്കിലും അനുസരിക്കുമോ എന്ന് അദ്ദേഹം ചോദിച്ചു. ജനങ്ങൾക്ക് വേണ്ടി ഉള്ളതാണ് സമരം. സമരത്തിൽ നിന്നും ഒരിക്കലും പിന്മാറില്ല. പണിയെടുക്കാനുള്ള അവകാശം ഉള്ളപോലെ പണി മുടക്കാനും അവകാശം ഉണ്ടെന്ന് ആനത്തലവട്ടം പറഞ്ഞു.
പണിമുടക്കുക എന്നത് ഒരു പൗരന്റെ മൗലിക അവകാശമാണ്. അവകാശ ബോധമുള്ള തൊഴിലാളികളെ ഓലപ്പാമ്പ് കാട്ടി പേടിപ്പിക്കാൻ നോക്കേണ്ട. മുൻപും നിരവധി സമരങ്ങൾ നടത്തിയിട്ടുണ്ട്. എല്ലാ വിഭാഗം ജനങ്ങൾക്കും വേണ്ടിയാണ് ഇങ്ങനെ ഒരു സമരം. പണിമുടക്കേണ്ടെന്ന് പറയാൻ ഹൈക്കോടതിയ്ക്ക് എന്താണ് അധികാരം. പണി എടുക്കണമെന്ന് ആരാണ് നിർബന്ധിക്കുക. തനിക്കിന്ന് പണിയെടുക്കാൻ മനസ്സില്ലെന്നും ആനത്തലവട്ടം വ്യക്തമാക്കി.
നവംബർ മുതൽ പണിമുടക്കിനോട് സഹകരിക്കണം എന്ന് നിരന്തരം ആവശ്യപ്പെട്ടതാണ്. വ്യാപാരി വ്യവസായികൾ കട തുറക്കും എന്ന് പറയുന്നു. അങ്ങനെ എങ്കിൽ കടകളിൽ പോകാൻ ആളുകൾ വേണ്ടേ. ചില സമര വിരോധികൾ ആണ് ഇങ്ങനെ ഒരു തീരുമാനം എടുക്കുന്നത്. വ്യാപാരി വ്യവസായി ഏകോപന സമിതി സമര വിരോധികൾ തന്നെയാണ്. അവരുടെ പലപ്പോഴുള്ള സമീപനവും അങ്ങനെ ആണെന്നും ആനത്തലവട്ടം പറഞ്ഞു.
Comments