മുംബൈ: ഐപിഎല്ലിൽ പഞ്ചാബ് കിംഗ്സിനെ ആറ് വിക്കറ്റിന് തകർത്ത് കൊൽക്കത്ത നൈറ്റ് റൈഡേഴ്സ്. 14.3 ഓവറിൽ, നാല് വിക്കറ്റ് നഷ്ടത്തിൽ 141 റൺസ് എടുത്താണ് കൊൽക്കത്ത വിജയത്തിലെത്തിയത്. 33 പന്തുകൾ ശേഷിക്കെയാണ് കെകെആറിന്റെ വിജയം. സീസണിൽ കെകെആറിന്റെ രണ്ടാം വിജയമാണിത്.
31 പന്തുകളിൽ നിന്ന് 70 റൺസ് എടുത്ത ആന്ദ്രെ റസ്സലാണ് കൊൽക്കത്തയ്ക്ക് വിജയം സമ്മാനിച്ചത്. 26 പന്തുകളിലായിരുന്നു റസ്സൽ അർദ്ധ സെഞ്ച്വറി അടിച്ചത്. എട്ട് സിക്സറാണ് റസ്സൽ പറത്തിയത്. രണ്ടു ഫോറുകളും താരം അടിച്ചു. ഒപ്പം ബാറ്റ് ചെയ്ത സാം ബില്ലിംഗ്സ് 23 പന്തുകളിൽ 24 റൺസ് നേടി.
കെകെആറിന്റെ ഓപ്പണർ അജിൻക്യാ രഹാനെ 12 റൺസിനും വെങ്കിടേഷ് അയ്യർ മൂന്ന് റൺസിനും പുറത്തായിരുന്നു. പിന്നാലെ വന്ന ക്യാപ്റ്റൻ ശ്രേയസ് അയ്യർ 15 പന്തിൽ 26 റൺസിന് പുറത്തായി. പിന്നാലെ എത്തിയ നിതീഷ് റാണ റൺസ് ഒന്നും നേടാതെ തന്നെ പുറത്തായി. ഇതിന് ശേഷം സാം ബില്ലിംഗ്സും ആന്ദ്രെ റസ്സലും ഒന്നിച്ചതോടെ കൊൽക്കത്ത വിജയ കുതിപ്പ് നടത്തുകയായിരുന്നു.
റബാദയും, ഒഡിയൻ സ്മിത്തും, ചാഹറുമാണ് കെകെആറിന്റെ വിക്കറ്റ് വീഴ്ത്തിയത്. രഹാനെയാണ് റബാദയുടെ പന്തിന് വഴങ്ങിയത്. വെങ്കടേഷ് അയ്യരുടെ വിക്കറ്റാണ് ഒഡിയൻ സ്മിത്ത് വീഴ്ത്തിയത്. ശ്രേയസ് അയ്യരുടെയും, റാണയുടെയും വീക്കറ്റാണ് ചാഹർ നേടിയത്.
ടോസ് ലഭിച്ച കൊൽക്കത്ത, പഞ്ചാബിനെ ബാറ്റിംഗിനയക്കുകയായിരുന്നു. രാജ്പക്സെയും(31) കഗിസോ റബാദെയും(25) മാത്രമാണ് പഞ്ചാബ് നിരയിൽ പിടിച്ചുനിന്നത്. ശിഖർ ധവാൻ(16), ലിയാം ലിവിങ്സ്റ്റണ്(19), രാജ് ബാവ(11), ഹർപ്രീത് ബ്രാർ(14) എന്നിവരാണ് പഞ്ചാബ് നിരയിൽ രണ്ടക്കം കടന്ന മറ്റ് താരങ്ങൾ. ക്യാപ്റ്റൻ മായങ്ക് അഗർവാൾ(1), ഷാരൂഖ് ഖാൻ(0), രാഹുൽ ചാഹർ(0), അർഷ്ദീപ് സിംഗ്(0) എന്നിവരാണ് പഞ്ചാബിന്റെ വിജയപ്രതീക്ഷകൾ തച്ചുടച്ചത്.
ഉമേഷ് യാദവ് നാല് വിക്കറ്റുകൾ വീഴ്ത്തിയതോടെ, ഐപിഎല്ലിൽ പവർപ്ലേ ഓവറുകളിൽ 50 വിക്കറ്റ് തികയ്ക്കുന്ന നാലാമത്തെ താരമായി മാറി. സഹീർ ഖാൻ, സന്ദീപ് ശർമ്മ, ഭുവനേശ്വർ കുമാർ എന്നിവരാണ് ഉമേഷിന് മുന്നിലുള്ളത്.
