പെൺമക്കളെ ലോകം കാണിക്കണം, അതിനായി പത്ത് കോടി ചിലവിട്ട് ക്രൂയിസ് കപ്പലിൽ അപ്പാർട്ട്മെന്റ് വാങ്ങിയിരിക്കുകയാണ് ദമ്പതികൾ. യുഎസിലെ ലോസ് ആഞ്ചലസിലുള്ള മാർക്ക്-ബെത്ത് ഹണ്ടർ ദമ്പതികളാണ് സ്വന്തം മക്കളെ ലോകം മുഴുവൻ കാണിക്കാനായി കപ്പലിനുള്ളിൽ പ്രത്യേക അപ്പാർട്ട്മെന്റ് വാങ്ങിയത്.
എപ്പോഴും ലോകം മുഴുവൻ ചുറ്റണമെന്ന് അതിയായ ആഗ്രഹമുണ്ടായിരുന്നു. അതിനായി ആദ്യം ഒരു ചെറിയ ബോട്ടാണ് തീരുമാനിച്ചിരുന്നത്. എന്നാൽ പിന്നീട് മക്കൾക്ക് വേണ്ടി വലുത് തന്നെ വേണമെന്ന് കരുതി. അപ്പോഴാണ് അപ്പാർട്ട്മെന്റ് നൽകുന്ന നരേറ്റീവ് എന്ന കപ്പലിനെക്കുറിച്ച് അറിഞ്ഞത് എന്ന് ബെത്ത് ഹണ്ടർ പറയുന്നു.
തങ്ങൾ ലോകമെമ്പാടും സഞ്ചരിക്കുന്നതിനെക്കുറിച്ച് എപ്പോഴും ചിന്തിച്ചിരുന്നുവെന്നും അതിനാൽ കപ്പലുകളെക്കുറിച്ച് എല്ലാം പഠിച്ചിരുന്നുവെന്നും ബെത്ത് ഹണ്ടർ പറഞ്ഞു. ചെറിയ കപ്പലിൽ യാത്ര പോവാനാണ് തീരുമാനിച്ചിരുന്നത്. എന്നാൽ അറ്റകുറ്റപ്പണികൾക്കും മറ്റുമായി വളരെയധികം സമയം ചെലവഴിക്കേണ്ടി വരുമെന്ന് മനസിലായി. അതുകൊണ്ട് തന്നെയാണ് കപ്പലിൽ അപ്പാർട്ട്മെന്റ് തിരഞ്ഞെടുത്തത്. കപ്പൽ പുറപ്പെടുമ്പോൾ പെൺമക്കൾക്ക് 14-ും, 16-ും വയസ്സായിരിക്കും.
ഈ വർഷം അവസാനമാണ് ക്രൊയേഷ്യയിൽ 547 റെസിഡൻഷ്യൽ അപ്പാർട്ട്മെന്റുകളുള്ള കൂറ്റൻ കപ്പൽ നിർമ്മിക്കുക. 20 ഡൈനിംഗ് റൂമുകൾ, ബാർ വേദികൾ, മൂന്ന് സ്വിമ്മിംഗ് പൂളുകൾ, ഒരു ആർട്ട് സ്റ്റുഡിയോ, പെറ്റ് എക്സർസൈസ് ഏരിയ തുടങ്ങിയവ ഉണ്ടായിരിക്കുമെന്ന് കപ്പൽ നിർമ്മാണ കമ്പനിയായ സ്റ്റോറിലൈൻസ് പറയുന്നു. റണ്ണിംഗ് ട്രാക്ക്, ജിം, യോഗ സ്റ്റുഡിയോ, ഗോൾഫ് സിമുലേറ്ററുകൾ, പിക്കിൾബോൾ കോർട്ട് എന്നിവയുമുണ്ടാകും.
രണ്ട് കിടപ്പുമുറി, രണ്ട് ബാത്ത്റൂം എന്നിവയാണ് കപ്പലിനകത്തെ അപ്പാർട്ട്മെന്റിലുള്ളത്. ഇത് കൂടാതെ, ക്ലിനിക്, ലൈബ്രറി, സ്പാ, സിനിമ തുടങ്ങി പല സൗകര്യങ്ങളും കപ്പലിനകത്തുണ്ട്.
2024 -ൽ കടലിലിറങ്ങുന്ന കപ്പൽ വിവിധ തുറമുഖങ്ങളിൽ നങ്കൂരമിടും. ആ സ്ഥലവും അവിടുത്തെ കാഴ്ചകളും എല്ലാം കപ്പലിലെ താമസക്കാർക്ക് ആസ്വദിക്കാം. നിരവധി സാഹസിക യാത്രകളും നടത്താം.
