അഹമ്മദാബാദ്: ആം ആദ്മി പാർട്ടി സംഘടിപ്പിച്ച അഹമ്മദാബാദ് റോഡ്ഷോയിൽ പങ്കെടുക്കാൻ ആളുകൾക്ക് പണം വിതരണം ചെയ്തതായി ബിജെപി ഐടി സെൽ മേധാവി അമിത് മാളവ്യ ആരോപിച്ചു. ഡൽഹി മുഖ്യമന്ത്രി അരവിന്ദ് കെജ്രിവാളും പഞ്ചാബ് മുഖ്യമന്ത്രി ഭഗവന്ത് മനും എത്തിച്ചേർന്ന അഹമ്മദാബാദ് റോഡ്ഷോ എഎപി പണം നൽകി ആളുകളെ വിളിച്ചുകൂട്ടിയതാണെന്ന് ബിജെപി ആരോപിച്ചു.
ഇത് വ്യക്തമാക്കുന്ന ചില വീഡിയോ ദൃശ്യങ്ങൾ പങ്കുവെച്ചുകൊണ്ടാണ് അമിത് മാളവ്യ ഇക്കാര്യം അറിയിച്ചത്. അഴിമതിയെ പുതിയ തലത്തിലേക്ക് അരവിന്ദ് കെജ്രിവാൾ കൊണ്ടുപോകുകയാണെന്ന് അമിത് മാളവ്യ ആരോപിച്ചു. എഎപിയുടെ ഭരണനിർവഹണം അഴിമതിയിൽ മുങ്ങിയിരിക്കുകയാണെന്നും അമിത് മാളവ്യ പറഞ്ഞു.
AAP distributing cash to people to participate in Arvind Kejriwal’s roadshow in Gujarat…
बहुत क्रांतिकारी। pic.twitter.com/mRpmKUYSOR
— Amit Malviya (@amitmalviya) April 2, 2022
2022 അവസാനത്തോടെ ഗുജറാത്തിൽ നടക്കാനിരിക്കുന്ന നിയമസഭാ തിരഞ്ഞെടുപ്പിന് മുന്നോടിയായി അഹമ്മദാബാദിൽ സംഘടിപ്പിച്ച റോഡ്ഷോയിൽ പങ്കെടുക്കാനാണ് അരവിന്ദ് കെജ്രിവാളും പഞ്ചാബ് മുഖ്യമന്ത്രിയുമെത്തിയത്. ഇതോടെ ഗുജറാത്തിൽ തിരഞ്ഞെടുപ്പ് പ്രചാരണത്തിന് തുടക്കമിടുകയായിരുന്നു എഎപി. 25 വർഷമായി ഗുജറാത്തിൽ അധികാരത്തിലിരിക്കുന്ന ബിജെപിക്ക് അഹങ്കാരമാണെന്നും ‘ഒരു അവസരം’ തന്റെ പാർട്ടിക്ക് നൽകണമെന്നും അരവിന്ദ് കെജ്രിവാൾ പറഞ്ഞു.
ഡൽഹിയിലെ ജനങ്ങളെപ്പോലെ ആം ആദ്മി പാർട്ടിക്ക് നിങ്ങളും അവസരം നൽകുക. നിങ്ങൾക്ക് എഎപി സർക്കാരിനെ ഇഷ്ടപ്പെട്ടില്ലെങ്കിൽ ബിജെപിയെ തിരികെ കൊണ്ടുവന്നോളൂവെന്നും കെജ്രിവാൾ ഗുജറാത്തിലെ ജനങ്ങളോട് പറഞ്ഞു.
