ലക്നൗ: റമദാൻ മാസത്തിൽ ജനങ്ങൾക്ക് ആശംസകളുമായി ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. കൊറോണ ഭീതി ഒഴിയാത്ത സാഹചര്യത്തിൽ ആഘോഷങ്ങൾ സുരക്ഷിതമായിരിക്കണം എന്ന് അദ്ദേഹം ജനങ്ങളോട് അഭ്യർത്ഥിച്ചു. മാത്രമല്ല, സാംസ്കാരിക ഐക്യത്തിന്റെയും സാഹോദര്യത്തിന്റെയും മാതൃകയായി ഉത്തർപ്രദേശ് മാറിയെന്നും അദ്ദേഹം കൂട്ടിച്ചേർത്തു.
‘വിശുദ്ധ റമദാൻ ദിനങ്ങളിൽ നോമ്പ്, മനുഷ്യരാശിക്കുള്ള സേവനം, ദൈവത്തോടുള്ള ഭക്തി തുടങ്ങിയ മഹത്തായ കർമ്മങ്ങൾ ക്ഷമ, അച്ചടക്കം, ലാളിത്യം എന്നീ മൂല്യങ്ങൾ ഉയർത്താൻ ഏവരെയും സഹായിക്കുന്നു. കൊറോണയുടെ പശ്ചാത്തലത്തിലും, പൈതൃകവും, പാരമ്പര്യവും നിലനിർത്തി എല്ലാ ആളുകളും മുൻകരുതലുകൾ എടുത്ത് റമദാൻ കാലത്ത് മതപരമായ പ്രവർത്തനങ്ങൾ നടത്തണം’ യോഗി ആദിത്യനാഥ് പറഞ്ഞു.
റമദാൻ മാസത്തിൽ വിശ്വാസികൾക്ക് ആശംസകളുമായി പ്രധാനമന്ത്രി നരേന്ദ്ര മോദിയും എത്തിയിരുന്നു. പാവപ്പെട്ടവരെ സേവിക്കാൻ ഈ പുണ്യമാസം ജനങ്ങളെ പ്രചോദിപ്പിക്കട്ടെയെന്നും സമൂഹത്തിൽ ശാന്തിയുടെയും ഐക്യത്തിന്റെയും അനുകമ്പയുടെയും ചൈതന്യം പടരട്ടെയെന്നും പ്രധാനമന്ത്രി ആശംസിച്ചു.
