ലക്നൗ: ഉത്തർപ്രദേശ് മുഖ്യമന്ത്രി യോഗി ആദിത്യനാഥിനെതിരെ വധഭീഷണിയുമായി സമാജ്വാദി പാർട്ടി എംഎൽഎ ഷസീൽ ഇസ്ലാം. ഇപ്പോൾ നിയമസഭയിൽ എസ്പിയുടെ കൂടുതൽ എംഎൽഎമാർ ഉണ്ടെന്നും, യോഗി ആദിത്യനാഥ് പറയുന്ന ഓരോ വാക്കുകൾക്കും അയാളുടെ വായിലേക്ക് നിറയൊഴിക്കുമെന്നാണ് എസ്പി നേതാവിന്റെ വീരവാദം. ഇതിന്റെ വീഡിയോ സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്. ബറേലി ജില്ലയിലെ ഭോജിപ്പൂരയിൽ നിന്നുള്ള എംഎൽഎ ആണ് ഷസീൽ ഇസ്ലാം.
‘ ഈ സർക്കാരിനെതിരെ നിയമസഭയ്ക്കുള്ളിലും തെരുവിലും ശക്തമായ പ്രതിഷേധം നടത്തുമെന്നാണ് നമ്മുടെ പാർട്ടിയുടെ ദേശീയ പ്രസിഡന്റ് അഖിലേഷ് യാദവ് പറഞ്ഞിരിക്കുന്നത്. നമ്മൾ ഭയപ്പെടേണ്ട യാതൊരു ആവശ്യവുമില്ല. അയാൾ ഏകാധിപതിയെ പോലെ പ്രവർത്തിച്ചിരുന്ന നാളുകൾ ഒക്കെ കഴിഞ്ഞു പോയി. ഇപ്പോൾ ഉത്തർപ്രദേശിൽ ശക്തമായ ഒരു പ്രതിപക്ഷ നിരയുണ്ട്. ഭയമേതുമില്ലാതെ മുന്നിൽ നയിക്കാൻ നമ്മുടെ പ്രിയ നേതാവ് അഖിലേഷ് യാദവ് നമുക്കൊപ്പമുണ്ട്. ഇനി അയാൾ എന്തെങ്കിലും ഒരു വാക്ക് പറഞ്ഞാൽ അയാളുടെ വായിലേക്ക് നമ്മൾ നിറയൊഴിക്കും. ഇത് മാത്രമാണ് എനിക്ക് പറയാനുള്ളത്’.
‘ 126 എംഎൽഎമാരാണ് നമ്മുടെ പാർട്ടിയിൽ നിന്നും നിയമസഭയിലേക്ക് എത്തുന്നത്. നേരത്തെ വെറും 47 പേർ മാത്രമാണ് ഉണ്ടായിരുന്നത്. ചിലപ്പോൾ 30 പേരോ, അല്ലെങ്കിൽ 25 പേരോ ഒക്കെയായിരിക്കും സഭയിൽ ഉണ്ടാവുക. ആ സമയത്ത് യോഗി ആദിത്യനാഥ് ധാരാളം കാര്യങ്ങൾ സഭയിൽ പറയും. സമാജ്വാദി പാർട്ടിക്ക് നേരെയും യോഗി വലിയ വിമർശനങ്ങൾ ഉയർത്തിയിട്ടുണ്ട്. പക്ഷേ ഇപ്പോൾ സഭയിൽ നമ്മൾ ധാരാളം പേരുണ്ട്. പ്രതിപക്ഷത്തെ നയിക്കാൻ അഖിലേഷ് യാദവ് ഉണ്ട്. ഇനി നിശബ്ദരായി ഇരിക്കില്ലെന്നും’ ഷസീൽ ഇസ്ലാം പറയുന്നു.
