കൊച്ചി: ഏറെ കാലമായി മലയാളികൾ കാത്തിരുന്ന മമ്മൂട്ടി ചിത്രം സിബിഐ 5 ദി ബ്രെയിൻ ടീസർ പുറത്തുവിട്ടു. സൈന മൂവീസിന്റെ യൂട്യൂബ് ചാനലിലൂടെയാണ് ടീസർ പുറത്തുവിട്ടത്. ഒരു പോലീസ് സ്‌റ്റേഷനിലെ രംഗങ്ങളിലൂടെയാണ് ടീസർ ആരംഭിക്കുന്നത്. മമ്മൂട്ടിയുടെ ശബ്ദമാണ് പശ്ചാത്തലത്തിൽ.
ഇന്ദിരാ ഗാന്ധിയുടേയും രാജീവ് ഗാന്ധിയുടേയും സഞ്ജയ് ഗാന്ധിയുടേയും മരണത്തെ പറ്റി പറഞ്ഞ് മുന്നോട്ട് നീങ്ങുന്ന ടീസർ നമുക്കറിയുന്നതിലും അപ്പുറമുണ്ടോ ആ മരണങ്ങളിൽ? പൊതുവായ എന്തെങ്കിലും ഘടകങ്ങൾ പൊതുവായ ഏതെങ്കിലും ശത്രു? തുടങ്ങിയ ചോദ്യങ്ങൾ എറിഞ്ഞാണ് ടീസർ മുന്നോട്ട് നീങ്ങുന്നത്.
1;29 മിനിറ്റ് ദൈർഘ്യമുള്ള ടീസറിൽ കഥയുടെ ഒരു ചെറിയ സൂചന പോലും ഇല്ല എന്നത് പ്രേക്ഷകർക്കുള്ളിൽ സേതുരാമനും കൂട്ടരും ഉദ്വേഗജനകമായ കേസ് അന്വേണമാണ് നടത്തുന്നതെന്ന് വ്യക്തമാക്കുന്നു.ടീസറിന്റെ അവസാന സീനുകളിൽ രഹസ്യം ഒളിപ്പിച്ച ചിരിയുമായി മമ്മൂട്ടി ഇരിക്കുമ്പോൾ സസ്‌പെൻസ് നിറഞ്ഞ ഒരു ചിത്രമാണ് പ്രേക്ഷകർക്കായി ഒരുക്കിയിരിക്കുന്നതെന്ന് കണക്കുകൂട്ടാം. സുദേവ് നായർ, സായികുമാർ,ആശാ ശരത്ത്, മുകേഷ്,പിഷാരടി, ദിലീഷ് പോത്തൻ എന്നിവരേയെല്ലാം ടീസറിൽ കാണം. ചിത്രത്തിന്റെ റിലീസും ഉടനുണ്ടാകുമെന്നാണ് സൂചനകൾ.
എൻഎസ് സ്വാമിയുടെ തിരക്കഥയിൽ കെ മധുവാണ് ചിത്രം സംവിധാനം ചെയ്യുന്നത്. സ്വർഗചിത്ര അപ്പച്ചനാണ് ചിത്രം നിർമ്മിക്കുന്നത്. സിബിഐയുടെ ഐക്കണിക് തീം മ്യൂസിക് ഒരുക്കുന്നത് ജേക്‌സ് ബിജോയ് ആണ്. ഛായാഗ്രഹണം അഖിൽ ജോർജ്, എഡിറ്റിങ് ശീകർ പ്രസാദ്.
ആശാ ശരത്താണ് ചിത്രത്തിൽ മമ്മൂട്ടിയുടെ നായികയായി എത്തുന്നത്. നീണ്ട ഇളവേളയ്‌ക്ക് ശേഷം ജഗതി ശ്രീകുമാർ വീണ്ടും സിനിമയിലേക്ക് എത്തുന്നുവെന്ന പ്രത്യേകതയും ചിത്രത്തിനുണ്ട്. മുകേഷ്, രൺജി പണിക്കർ, സായ് കുമാർ എന്നിവർക്കൊപ്പം വലിയ താരനിരയാണ് ചിത്രത്തിൽ സുപ്രധാന വേഷങ്ങൾ കൈകാര്യം ചെയ്യുന്നത്.
1988ൽ പുറത്തിറങ്ങിയ ഒരു സിബിഐ ഡയറിക്കുറിപ്പ് എന്ന ചിത്രത്തിലൂടെയാണ് സിബിഐ സീരീസ് ആരംഭിച്ചത്. തുടർന്ന് ജാഗ്രത, സേതുരാമയ്യർ സിബിഐ, നേരറിയാൻ സിബിഐ സിനിമകളും ഈ സീരീസിലേതായി പുറത്തിറങ്ങി.
