കുട്ടികൾ മുതൽ മുതിർന്നവർവരെ കഴിക്കാൻ ഇഷ്ടപ്പെടുന്ന ഒന്നാണ് ഐസ്‌ക്രീമുകൾ. ഈ ഇഷ്ടം അറിഞ്ഞുകൊണ്ടുതന്നെ വിവിധ കമ്പനികൾ വിവിധ രുചികൾ ഉള്ള ഐസ്‌ക്രീമുകൾ വിപണിയിൽ നമുക്കായി ഒരുക്കുന്നു. എന്നാൽ ഐസ്ക്രീം കഴിക്കുന്നത് തൊഴിലാക്കി മാറ്റിയ ഒരാൾ ഈ ലോകത്ത് ഉണ്ടെന്നു പറഞ്ഞാൽ വിശ്വസിക്കാനാകുമോ?. ആഹാ കേൾക്കുമ്പോൾ നല്ല രസം തോന്നുമെങ്കിലും ഈ ജോലി അത്ര എളുപ്പമല്ലെന്നാണ് അമേരിക്കക്കാരനായ ജോൺ ഹാരിസൺ പറയുന്നത്.
ഐസ്ക്രീം ടേസ്റ്റർ എന്ന നിലയിൽ ഔദ്യോഗിക ജീവിതം ആരംഭിക്കുന്നത് 1980 ൽ അദ്ദേഹത്തിന്റെ മാതൃസഹോദരന്റെ എഡിസ് എന്ന പാർലറിൽ നിന്നായിരുന്നു. അവിടെ അസിസ്റ്റന്റ് ടേസ്റ്റർ ആയതോടെയാണ് ജീവിതം മാറിമറയുന്നത്. നിലവിൽ എഡീസ് ഐസ്ക്രീം പാർലറിൽ 40 വർഷത്തെ ഔദ്യോഗിക ജീവിതം പൂർത്തിയാക്കുന്ന ഹാരിസൺ രുചിച്ച് നോക്കിയതാകട്ടെ 300 മില്യൺ ലിറ്ററിലധികം ഐസ്‌ക്രീമും.
സാധാരണ എട്ട് മണിക്കൂർ ആണ് ജോലി സമയം എങ്കിൽ ഹാരിസണ് ജോലി അഞ്ച് മണിക്കൂർ മാത്രമേയുള്ളു. ആകർഷകമായ ശമ്പളവും. എല്ലാ ദിവസവും പുലർച്ചെ മുതൽ തന്നെ അദ്ദേഹം തന്റെ ജോലി ആരംഭിക്കും. ഐസ്‌ക്രീമുകൾ രുചിച്ച് നോക്കുകയാണ് പണി. ഏകദേശം അഞ്ച് മണിക്കൂർ നേരമെടുത്താണ് ഹാരിസൺ ഇത് പൂർത്തിയാക്കുക.
എഡീസ് ഐസ്ക്രീം പാർലറിൽ 20 രുചി വൈവിധ്യങ്ങളിലുള്ള ഐസ്‌ക്രീമുകളാണ് നിർമ്മിക്കുക. ഇതിൽ ഒരു ഫ്‌ളേവർ തന്നെ മൂന്ന് തവണ രുചിച്ച് എല്ലാം കിറു കൃത്യമാണോയെന്ന് അദ്ദേഹം പരിശോധിക്കും.
നിർമ്മാണത്തിന്റെ ആദ്യ ഘട്ടത്തിലും, മദ്ധ്യഘട്ടത്തിലും, അവസാന ഘട്ടത്തിലുമാണ് രുചി നോക്കേണ്ടത്. അങ്ങിനെ എല്ലാ ഫ്‌ളേവറുകളും രുചിക്കണം. ഇത്തരത്തിൽ ഒരു ദിവസം 60 പാക്കറ്റ് ഐസ്‌ക്രീമുകൾ ആണ് അദ്ദേഹം കഴിക്കുക. ഐസ്ക്രീം കഴിക്കാൻ ഹാരിസൺ ഉപയോഗിക്കുന്ന സ്പൂണിലും ഒരു കൗതുകം ഒളിഞ്ഞു കിടക്കുന്നുണ്ട്. മരത്തിന്റെയും പ്ലാസ്റ്റിക്കിന്റെയും സ്പൂണല്ല മറിച്ച് സ്വർണം പൂശിയ സ്പൂണിൽ ആണ് അദ്ദേഹം ഐസ്ക്രീം ടേസ്റ്റ് ചെയ്യാനായി ഉപയോഗിക്കുന്നത്.
ഔദ്യോഗിക ജീവിതത്തിൽ നാല് പതിറ്റാണ്ട് പൂർത്തിയാക്കുന്ന ഹാരിസണിന്റെ സേവനത്തെ വിശിഷ്ടമായി കരുതുന്ന കമ്പനി അദ്ദേഹത്തിന്റെ നാക്കിലെ രസമുകുളങ്ങൾക്ക് ഇൻഷൂറൻസ് ഏർപ്പെടുത്തിയിട്ടുണ്ട്. ആ തുക കേട്ടാൽ നമ്മൾ വീണ്ടും ഞെട്ടും. ഒരു രസമുകുളത്തിന് 100 ഡോളർ എന്ന നിരക്കിലാണ് ഇൻഷൂറൻസ് ഏർപ്പെടുത്തിയിരിക്കുന്നത്.
എന്നാൽ എല്ലാവരും കൗതുകത്തോടെ കാണുന്ന ഈ ജോലി അത്ര എളുപ്പമുള്ളതല്ലെന്നാണ് ഹാരിസൺ പറയുന്നത്. എങ്കിലും ഇത് താൻ സന്തോഷത്തോടെയാണ് ചെയ്യുന്നതെന്നും അദ്ദേഹം പറയുന്നു.
പ്രായം 70 തികഞ്ഞ ഒരു കുട്ടിയാണ് താൻ. കാരണം ഇപ്പോഴും ഐസ്ക്രീം ഇഷ്ടപ്പെടുകയും കഴിക്കുകയും ചെയ്യുന്നു. ജോലിയിൽ പ്രവേശിച്ചതോടെ തന്റെ ഭാരം കൂടി. ആരാണ് മെലിഞ്ഞിരിക്കുന്ന ഐസ്ക്രീം ടേസ്റ്റർ മാരെ വിശ്വസിക്കുകയെന്നും അദ്ദേഹം നർമ്മ ഭാവത്തിൽ പ്രതികരിക്കുന്നു.
