അത്ഭുതം എന്ന് തോന്നിപ്പിക്കുന്ന മായക്കാഴ്ചകളുടെ കലവറയാണ് ലോകം. അത്തരത്തിലുള്ള നിരവധി സ്ഥലങ്ങളെ കുറിച്ച് നാം കേട്ടിട്ടുമുണ്ട്. ചില സ്ഥലങ്ങളെ കുറിച്ച് കേൾക്കുമ്പോൾ പണ്ടെങ്ങോ കേട്ട നാടോടിക്കഥയിലെ സ്ഥലം പോലെ തോന്നാം. ആ ചിന്തയാണ് നോക്കി നിൽക്കുമ്പോൾ നിറം മാറുന്ന ഒരു തടാകത്തെ കുറിച്ച് കേൾക്കുമ്പോൾ എല്ലാവരുടെയും മനസ്സിലേയ്ക്ക് വരുന്നത്. അറിയാം യുനസ്കോയുടെ ലോകപൈതൃക പട്ടികയിൽ സ്ഥാനം പിടിച്ച നിറം മാറുന്ന തടാകത്തെ കുറിച്ച്.
ടിബറ്റൻ പീഠഭൂമിയുടെ താഴ് വരയിൽ സ്ഥിതി ചെയ്യുന്ന ജിയുഷൈഗോ ദേശീയോദ്യാനം സന്ദർശകരെ അത്ഭുതങ്ങളുടെ വേറൊരു ലോകത്തെത്തിക്കുന്നു..നാടോടിക്കഥകളിലേതുപോലെ അതിമനോഹരമായ ഭൂപ്രകൃതിയാണ് ജിയുഷൈഗോ ദേശീയോദ്യാനത്തിന്റെ പ്രത്യേകത. വർണ്ണാഭമായ തടാകങ്ങൾ..മനോഹരമായ വെള്ളച്ചാട്ടങ്ങൾ..പർവതങ്ങൾ എന്നിവയുടെ മനംമയക്കുന്ന കാഴ്ചകൾ ഇവിടെ കാണാൻ സാധിക്കും. ജിയുഷൈഗോ എന്നും ജിയുഷൈ താഴ് വരയെന്നും ഈ ദേശീയോദ്യാനം അറിയപ്പെടുന്നു.
മനുഷ് നിർമ്മിതമായ കാഴ്ചകളുള്ള ഒരിടമല്ല ഇവിടം. പ്രകൃതിയുടെ അത്ഭുതകരമായ സൗന്ദര്യമാണ് ഇവിടെ കാണാൻ സാധിക്കുന്നത്. ജിയുഷൈഗോ ദേശീയോദ്യാനത്തിലെ ഏറ്റവും രസകരമായതും അത്സമയം വിസ്മയിപ്പിക്കുന്നതുമായ ഇടങ്ങളിൽ ഒന്നാണ് ഇവിടുത്തെ ഫൈവ് ഫ്ലവർ ലേക്ക്. ദേശീയോദ്യാനത്തിലെ എല്ലാ കാഴ്ചകളും ഒന്നിനൊന്നു മെച്ചമാണെങ്കിലും ഏറ്റവും അധികം സന്ദർശകരെ ആകർഷിക്കുന്നത് ഫൈവ് ഫ്ലവർ ലേക്ക് തന്നെയാണ്. നിന്ന നിൽപ്പിൽ നിറം മാറുന്ന ഈ തടാകം എത്ര തണുപ്പുകാലമാണെങ്കിൽ പോലും ഒരിക്കലും തണുത്തുറയില്ലത്രെ!
പർവതങ്ങളാൽ ചുറ്റപ്പെട്ട് കിടക്കുന്ന ഫൈവ് ഫ്ലവർ തടാകത്തിന്റെ ആഴം 16 അടിയാണ്. എന്നാലും, അതിന്റെ അടിത്തട്ട് വരെ കാണാൻ സാധിക്കും. അടിത്തട്ടിൽ കിടക്കുന്ന മരത്തടികളുടെയും കല്ലുകളുടെയും കാഴ്ചയായിരിക്കും ഇവിടെ എത്തുന്നവർ ആദ്യം ശ്രദ്ധിക്കുക. മാറിമാറി വരുന്ന നിറങ്ങളാണ് തടാകത്തെ വ്യത്യസ്തമാക്കുന്നത്. ആംബർ യെല്ലോ, എമറാൾഡ് ഗ്രീൻ, ഡാർക്ക് ജെയ്ഡ്, ലൈറ്റ് ടർക്കോയ്സ് എന്നീ നിറങ്ങളാണ് മാറി മാറി വരുന്നത്. ഈ നിറങ്ങൾ കണ്ണുകൾക്ക് ഇമ്പമുള്ള കാഴ്ചയാണ് സമ്മാനിക്കുന്നത്. എന്നാൽ കൂടുതൽ സമയം തടാകത്തിന്റെ നിറം സഫർ ബ്ലൂ ആയിരിക്കും. ലൈം കാൽസ്യം കാർബണേറ്റ്, വിവിധ നിറങ്ങളിലുള്ള ഹൈഡ്രോഫൈറ്റുകൾ എന്നീ ഘടകങ്ങളാണ് തടാകത്തിലെ ജലത്തിന്റെ നിറം മാറാൻ കാരണമാകുന്നതെന്നാണ് ശാസ്ത്രജ്ഞർ പറയുന്നത്.
സമീപ പ്രദേശങ്ങളിലെ തടാകങ്ങളിലെ ജലം വേനൽക്കാലങ്ങളിൽ വറ്റുമ്പോഴും ഫൈവ് ഫ്ലവർ തടാകത്തിലെ ജലത്തിനു യാതൊരു തരത്തിലുള്ള മാറ്റവും സംഭവിക്കാറില്ല. മാത്രമല്ല, അതിശൈത്യത്തിൽ മറ്റുതടാകങ്ങളിലെ ജലം തണുത്തുറയുമ്പോഴും ഇവിടുത്ത ജലത്തിനു യാതൊരു മാറ്റവും സംഭവിക്കില്ല. വെള്ളത്തിനടിയിലുള്ള ചൂടുനീരുറവ തടാകത്തിലേയ്ക്ക് ഒഴുകുന്നതിനാസാണ് എത്ര കടുത്ത ശൈത്യത്തിൽ പോലും തടാകം തണുത്തറയാത്തത് എന്നാണ് ശാസ്ത്രീയവശം. ഇത്രയേറെ അദ്ഭുതങ്ങൾ സംഭവിക്കുന്നതു കൊണ്ടു തന്നെ ഫൈവ് ഫ്ലവർ തടാകത്തിനെ വിശുദ്ധമായാണ് കണക്കാക്കുന്നത്.
സെപ്റ്റംബർ, ഒക്ടോബർ മാസങ്ങളാണ് തടാകം സന്ദർശിക്കാൻ അനുയോജ്യമായ സമയം. ഈ സമയത്ത് തടാകത്തിന് ചുറ്റുമുള്ള മലഞ്ചെരിവുകൾ അതിമനോഹരമായ വർണ്ണങ്ങളാൽ നിറഞ്ഞ് നിൽക്കുന്ന കാഴ്ച കാണാനാകും. ഈ നിറങ്ങൾ മുഴുവൻ തടാകത്തിലെ വെള്ളത്തിൽ പ്രതിഫലിക്കുകയും അതിശയിപ്പിക്കുന്ന ഒരു ദൃശ്യമായി അത് മാറുകയും ചെയ്യുന്നു. പ്രകൃതിയൊരുക്കിയ ദൃശ്യവിരുന്ന് കാണാൻ ജനപ്രവാഹമാണ് ഇവിടേയ്ക്ക് എത്തുന്നത്.
Comments