ന്യൂഡൽഹി: യൂണിവേഴ്സിറ്റി ഗ്രാന്റ്സ് കമ്മീഷന്റെ(യു.ജി.സി) ഔദ്യോഗിക ട്വിറ്റർ അക്കൗണ്ട് ഹാക്ക് ചെയ്യപ്പെട്ടു. അക്കൗണ്ടിൽ നിന്നും നിരവധി ആളുകളെ ടാഗ് ചെയ്ത് ഹാക്കർ ട്വീറ്റുകൾ പോസ്റ്റ് ചെയ്യാൻ ആരംഭിച്ചതോടെയാണ് ഹാക്ക് ചെയ്യപ്പെട്ട വിവരം തിരിച്ചറിയുന്നത്. ഇന്നലെ കേന്ദ്ര കാലാവസ്ഥ നിരീക്ഷണ കേന്ദ്രത്തിന്റെ ട്വിറ്റർ അക്കൗണ്ടും ഹാക്ക് ചെയ്യപ്പെട്ടിരുന്നു. രണ്ടിനും പിന്നിൽ ഒരാളായിരിക്കാമെന്നാണ് അന്വേഷണ ഉദ്യോഗസ്ഥരുടെ വിലയിരുത്തൽ.
അടുത്ത 2 മണിക്കൂറിനുള്ളിൽ കമ്മ്യൂണിറ്റിയിലെ എല്ലാ സജീവ NFT വ്യാപാരികൾക്കും ഞങ്ങൾ ഒരു എയർഡ്രോപ്പ് തുറന്നിരിക്കുന്നു എന്ന അറിയിപ്പ് ലഭിച്ചതോടെയാണ് അക്കൗണ്ട് ഹാക്ക് ചെയ്തതായി ശ്രദ്ധയിപ്പെട്ടത്. സമാനരീതിയിലുള്ള ട്വീറ്റാണ് കേന്ദ്ര കാലാവസ്ഥ നിരീക്ഷണ കേന്ദ്രത്തിന്റെ ട്വിറ്റർ അക്കൗണ്ടിൽ നിന്നും ഹാക്കർ ട്വീറ്റ് ചെയ്തത്. ഇതോടെ രണ്ടിനും പിന്നിൽ ഒരേ ഹാക്കറാണെന്ന് അന്വേഷണ ഉദ്യോഗസ്ഥർ ഉറപ്പിക്കുകയായിരുന്നു.
യു.ജി.സിയുടെ ട്വിറ്റർ അക്കൗണ്ടിന്റെ പ്രൊഫൈൽ ചിത്രവും ബയോയും ഹാക്കർ മാറ്റിയിരുന്നു. ഒരു കാർട്ടൂൺ ചിത്രമായിരുന്നു ഹാക്കർ ഉപയോഗിച്ചത്. അക്കൗണ്ട് പുനസ്ഥാപിക്കാനുള്ള നടപടികൾ ആരംഭിച്ചുവെന്നും ക്രമരഹതിമായി വരുന്ന അറിയിപ്പുകളും സന്ദേശങ്ങളും അവഗണിക്കണമെന്നും യു.ജി.സി അറിയിച്ചു.
രണ്ട് ദിവസത്തിനിടെ ഹാക്കർമാർ ലക്ഷ്യമിടുന്ന മൂന്നാമത്തെ സർക്കാർ അക്കൗണ്ടാണിത്. വെള്ളിയാഴ്ച രാത്രി ഉത്തർപ്രദേശ് മുഖ്യമന്ത്രി യോഗി ആദിത്യനാഥിന്റെ ഓഫീസിന്റെ (യുപി സിഎംഒ) ട്വിറ്റർ അക്കൗണ്ട് കുറച്ച് സമയത്തേക്ക് ഹാക്ക് ചെയ്യപ്പെട്ടു. കുറ്റക്കാർക്കെതിരെ കർശന നടപടിയെടുക്കുമെന്ന് യുപി സർക്കാർ ഉറപ്പ് നൽകിയിട്ടുണ്ട്.
