ഇന്ന് ശ്രീരാമ നവമി. മഹാവിഷ്ണുവിന്റെ ഏഴാമത്തെ അവതാരമായി പിറവിയെടുത്ത ശ്രീരാമചന്ദ്രന്റെ ജന്മദിനമാണ് രാമനവമി. അയോധ്യയിലെ രാജാവായിരുന്ന ദശരഥന്റെയും കൗസല്യയുടെയും ആദ്യ പുത്രനായാണ് ശ്രീരാമൻ ഭൂമിയിൽ അവതാരമെടുത്തത്. വർഷങ്ങൾക്കു ശേഷം ശ്രീരാമൻ സീതാ ദേവിയെ വിവാഹം ചെയ്തതും ഈ ദിനമാണെന്നാണ് സങ്കല്പം.
ചൈത്രമാസത്തിലെ ശുക്ലപക്ഷ നവമി മദ്ധ്യാഹ്നത്തിൽ വരുന്ന ദിവസമാണ് സൂര്യവംശ രാജാവായിരുന്ന ദശരഥന്റെയും കൗസല്യയുടെയും പുത്രനായി ശ്രീരാമന്റെ ജനനം. അസുര രാജാവായ രാവണനെ കൊല്ലുക എന്നതായിരുന്നു മഹാവിഷ്ണുവിന്റെ ഏഴാമത്തെ അവതാരം കൂടിയായ ശ്രീരാമചന്ദ്ര പ്രഭുവിന്റെ ലക്ഷ്യം.
ശ്രീരാമനവമി ദിവസത്തിൽ ഭക്തി പുരസ്സരം വ്രതം നോറ്റ് രാമനാമം ജപിക്കുന്നത് മോക്ഷപ്രാപ്തിക്കായുള്ള മാർഗ്ഗമായാണ് കരുതുന്നത്. ഉത്തരേന്ത്യയിൽ ശ്രീരാമ നവമി ആഘോഷങ്ങൾ ഒൻപത് ദിവസം നീണ്ടു നിൽക്കുന്നു. വസന്ത നവരാത്രിയുമായി ബന്ധപ്പെടുത്തിയും ശ്രീരാമനവമി ആഘോഷിക്കുന്നു.
രാജ്യത്തിന്റെ പല ഭാഗങ്ങളിലും ആഘോഷങ്ങൾ നടക്കാറുണ്ടെങ്കിലും അയോധ്യയിലെ ആഘോഷങ്ങൾ വേറിട്ടതു തന്നെയാണ്. പല ഭാഗത്ത് നിന്നുള്ള ഭക്തർ നവമി ദിനാഘോഷങ്ങളിൽ പങ്കെടുക്കാനായി അയോധ്യയിൽ എത്തിച്ചേരാറുണ്ട്. അയോധ്യ നഗരം വിളക്കുകൾ കൊണ്ട് അലങ്കരിക്കുകയും ഭക്തർ ക്ഷേത്രത്തിൽ വഴിപാടുകളുമായി എത്തുകയും ചെയ്യുന്നു.
രാമേശ്വരത്ത് സ്ഥിതി ചെയ്യുന്ന കോദണ്ഡ രാമർ ക്ഷേത്രം, സേലത്തെ പ്രസിദ്ധമായ ശ്രീരാമ ക്ഷേത്രം, കേരളത്തിലെ തൃപ്പയാർ ശ്രീരാമ ക്ഷേത്രം, തമിഴ്നാട്ടിലെ മുടികോണ്ടൻ കോദണ്ഡരാമർ ക്ഷേത്രം, കുംഭകോണത്തെ കൊളവില്ലി രാമൻ ക്ഷേത്രം തുടങ്ങിയവയാണ് ദക്ഷിണേന്ത്യയിലെ പ്രസിദ്ധമായ രാമക്ഷേത്രങ്ങൾ.
