മുംബൈ: ചെന്നൈ സൂപ്പർ കിങ്സിന്റെ സ്റ്റാർ പ്ലെയർ ദീപക് ചഹാർ ഐപിഎൽ 15-ാം സീസണിൽ നിന്നും പിന്മാറിയതായി റിപ്പോർട്ട്. താരത്തിന്റെ പഴയ പരിക്ക് വില്ലനായതോടെയാണ് സീസണിൽ നിന്നും പിന്മാറുന്നതെന്നാണ് സൂചന. നിലവിൽ ബെംഗളൂരുവിലെ നാഷണൽ ക്രിക്കറ്റ് അക്കാദമിയിലുള്ള ചഹാറിന് അടുത്തൊന്നും ടീമിനൊപ്പം ചേരാൻ സാധിക്കില്ലെന്നാണ് വിവരം. എന്നാൽ ഇക്കാര്യത്തിൽ ബിസിസിഐ ഔദ്യോഗിക വിശദീകരണം നൽകിയിട്ടില്ല.
കഴിഞ്ഞ ഒരു മാസത്തോളമായി ചഹാർ ദേശീയ ക്രിക്കറ്റ് അക്കാദമിയിലാണുള്ളത്. വെസ്റ്റ് ഇൻസീസിനെതിരായ മൂന്നാം ടി20ക്കിടെയാണ് താരത്തിന് പരിക്കേറ്റത്. തുടയിലായിരുന്നു അന്ന് ചഹാറിന് പരിക്കുപറ്റിയത്. എന്നാൽ, താരം സിഎസ്കെയ്ക്കായി കളത്തിലിറങ്ങുമെന്ന പ്രതീക്ഷയിലായിരുന്നു ടീം. ഏപ്രിൽ അവസാനത്തോടെ ചെന്നൈയ്ക്കായി ചഹാർ കളിച്ചേക്കുമെന്നാണ് റിപ്പോർട്ടുകൾ പുറത്തുവന്നത്. ഇപ്പോൾ മുതുകിനും പരിക്കുണ്ടായതോടെയാണ് താരത്തിന് ഐപിഎൽ സീസൺ പൂർണമായും നഷ്ടമാകുന്നത്.
14 കോടി രൂപക്കായിരുന്നു ചെന്നൈ ചഹാറിനെ മെഗാ താരലേലത്തിൽ സ്വന്തമാക്കിയത്. സീസണിൽ ഒരു ജയം പോലും നേടാൻ സാധിക്കാത്ത ചെന്നൈയ്ക്ക്, ഓൾറൗണ്ടറായ ചഹാറിന്റെ പരിക്ക് വൻ തിരിച്ചടി ആയിരിക്കുകയാണ്. കൂറ്റൻ ഷോട്ടുകൾ സമ്മാനിച്ച്, കഴിഞ്ഞ വർഷം ചെന്നൈയുടെ വിജയത്തിൽ നിർണായക പങ്കുവഹിച്ച താരമാണ് ചഹാർ. അതുകൊണ്ട് തന്നെയാണ് ചഹാർ ഇല്ലാത്തത് ടീമിന് വലിയ തിരിച്ചടിയായിരിക്കുന്നത്.
