തിരുവനന്തപുരം: കാർഷിക നിയമങ്ങൾ തിരിച്ചുവരുമെന്നും യഥാർത്ഥ കർഷകർ അത് ആവശ്യപ്പെടുമെന്നും സുരേഷ് ഗോപി എംപി. കേരളത്തിൽ ഏറ്റവും ഒടുവിലായി സംഭവിച്ച കുട്ടനാട്ടിലെ കർഷക ആത്മഹത്യയുടെ പശ്ചാത്തലത്തിലാണ് സുരേഷ് ഗോപിയുടെ പ്രതികരണം.
കാർഷിക നിയമങ്ങൾ പിൻവലിച്ചതിൽ ഏറ്റവുമധികം അമർഷമുള്ള ഒരാളാണ് താൻ. എന്നാൽ ആ നിയമങ്ങൾ തിരിച്ചുവരുമെന്നാണ് താൻ വിശ്വസിക്കുന്നത്. യഥാർത്ഥ കർഷകൻ അത് ആവശ്യപ്പെടുമെന്നും അദ്ദേഹം പറഞ്ഞു. തിരുവനന്തപുരത്ത് ബിജെപി പ്രവർത്തകർക്ക് വിഷുക്കൈനീട്ടം നൽകുന്ന ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം.
ഇതിനിടെ വടക്കുംനാഥ ക്ഷേത്രത്തിലെ മേൽശാന്തിയ്ക്ക് വിഷുക്കൈനീട്ടം നൽകിയതിൽ വിലക്ക് ഏർപ്പെടുത്തിയ സംഭവത്തിലും സുരേഷ് ഗോപി പ്രതികരിച്ചു. വിഷുക്കൈനീട്ടത്തിന്റെ നന്മ മനസിലാക്കാൻ പറ്റാത്തവരോട് എന്താണ് പറയുകയെന്ന് അദ്ദേഹം ചോദിച്ചു. ദക്ഷിണേന്ത്യക്കാരുടെ മുഴുവൻ ആചാരമാണ് താൻ നടപ്പിലാക്കിയത്. ഒരു രൂപ നോട്ടിൽ ഗാന്ധിയുടെ ചിത്രമാണുള്ളതെന്നും നരേന്ദ്രമോദിയുടേയോ സുരേഷ് ഗോപിയുടേയോ ചിത്രമല്ലെന്നും സുരേഷ് ഗോപി കൂട്ടിച്ചേർത്തു.
