മുംബൈ: ഐപിഎല്ലിൽ ഡൽഹി ക്യാപിറ്റൽസിനെതിരെ റോയൽ ചലഞ്ചേഴ്സ് ബാംഗ്ലൂരിന് 16 റൺസിന്റെ ജയം. ആദ്യം ബാറ്റ് ചെയ്ത ആർസിബി 20 ഓവറിൽ അഞ്ച് വിക്കറ്റ് നഷ്ടത്തിൽ 189 റൺസ് എടുത്തു. എന്നാൽ മറുപടി ബാറ്റിംഗിൽ ഡൽഹിയ്ക്ക് 20 ഓവറിൽ ഏഴ് വിക്കറ്റ് നഷ്ടത്തിൽ 173 റൺസ് മാത്രമാണ് നേടാനായത്. ദിനേശ് കാർത്തിക്കാണ് ആർസിബിയുടെ വിജയശിൽപ്പി. ബാംഗ്ലൂരിനായി ഡൽഹിയുടെ മൂന്ന് വിക്കറ്റ് വീഴ്ത്തിയ ജോഷ് ഹേസൽവുഡും മികച്ച പ്രകടനമാണ് കാഴ്ചവെച്ചത്.
ടോസ് നഷ്ടപ്പെട്ട് ബാറ്റിംഗിന് അയക്കപ്പെട്ട ബാംഗ്ലൂർ അഞ്ച് വിക്കറ്റ് നഷ്ടത്തിൽ 189 റൺസെടുത്തു. മോശം തുടക്കമാണ് ആർസിബിക്ക് ലഭിച്ചത്. തുടക്കത്തിൽ വിക്കറ്റ് നഷ്ടമായെങ്കിലും ഗ്ലെൻ മാക്സ്വെൽ, ദിനേശ് കാർത്തിക് എന്നിവരുടെ ഇന്നിംഗ്സാണ് ബാംഗ്ലൂരിന് തുണയായത്. ഓപ്പണർമാരായ അനുജ് റാവത്ത് (0), ഫാഫ് ഡു പ്ലെസിസ് (8) എന്നിവരുടെ വിക്കറ്റുകൾ ആദ്യ മൂന്ന് ഓവറിനിടെ ആർസിബിക്ക് നഷ്ടമായി. ഏഴാം ഓവറിൽ വിരാട് കോലി (12) റണ്ണൗട്ടാവുകയും ചെയ്തതോടെ ആർസിബി മൂന്നിന് 40 എന്ന നിലയിലായി. ഇതിനിടെ സുയഷ് (12) മടങ്ങിയതോടെ നാലിന് 75 എന്ന നിലയിലേക്ക് വീണു.
പിന്നാലെ എത്തിയ മാക്സ് വെല്ലാണ് ടീമിന് മികച്ച് സ്കോർ നേടാൻ സഹായിച്ചത്. 34 പന്തിൽ നിന്നും ഏഴ് ബൗണ്ടറികളുടെയും രണ്ട് സിക്സറുകളുടെയും സഹായത്തോടെ 55 റൺസാണ് മാക്സ് വെൽ കൂട്ടിച്ചേർത്തത്. എന്നാൽ, കുൽദീപ് യാദവിന്റെ പന്തിൽ 11 ഓവറിൽ മാക്സ് വെൽ പുറത്താകുകയായിരുന്നു. പിന്നീട് കളിക്കളത്തിലിറങ്ങയി ദിനേശ് കാർത്തിക്കാണ് ക്രീസിൽ നിറഞ്ഞാടിയത്. 34 പന്തിൽ നിന്നും അഞ്ച് ബൗണ്ടറികളുടെയും, അഞ്ച് സിക്സറുകളുടെയും അകമ്പടിയോടെ 66 റൺസ് എടുത്ത കാർത്തിക് പുറത്താകാതെ നിന്നു. 21 പന്തിൽ നിന്നും 32 റൺസ് എടുത്ത ഷഹബാദ് അഹമ്മദും ടീമിന് മികച്ച സ്കോർ നേടിക്കൊടുത്തു. ഷഹബാസും കാർത്തിക്കും ഇരുവരും കൂട്ടിചേർത്ത 97 റൺസാണ് മികച്ച സ്കോർ സമ്മാനിച്ചത്. അക്സർ പട്ടേൽ, ഷാർദുൽ താക്കൂർ, ഖലീൽ അഹമ്മദ്, കുൽദീപ് യാദവ് എന്നിവരാണ് ആർസിബിയുടെ വിക്കറ്റ് നേടിയത്.
മറുപടി ബാറ്റിംഗിനിറങ്ങിയ ഡൽഹിയ്ക്ക് മികച്ച പ്രകടനം കാഴ്ച വെയ്ക്കാൻ സാധിച്ചില്ല. ഡേവിഡ് വാർണറുടെ സ്കോറാണ് ടീമിന് തുണയായത്. 38 പന്ത് നേരിട്ട താരം നാല് ബൗണ്ടറികളുടെയും അഞ്ച് സിക്സറുകളുടെയും സഹായത്തോടെ 66 റൺസ് നേടി. മികച്ച ഫോമിലായിരുന്ന താരത്തെ ഹസരങ്ക എൽബിഡബ്യൂവിൽ കുടുക്കുകയായിരുന്നു.
പൃഥ്വി ഷാ(16), മിച്ചൽ മാർഷ്(14), റിഷഭ് പന്ത്(34), റോവ്മാൻ പവൽ(0), ലളിത് യാദവ്(1), അക്സർ പട്ടേൽ(10), കുൽദീപ് യാദവ്(10) എന്നിങ്ങനെയാണ് മറ്റ് താരങ്ങളുടെ സ്കോർ. ജോഷ് ഹേസൽവുഡ് ഡൽഹിയുടെ മൂന്ന് വിക്കറ്റുകൾ നേടി. മുഹമ്മദ് സിറാജ് രണ്ടും, വാനിന്ദു ഹസരങ്ക ഒരു വിക്കറ്റും വീഴ്ത്തി. ഇതോടെ ആറ് മത്സരങ്ങൾ കളിച്ച ആർസിബി എട്ട് പോയിന്റുകൾ നേടി പട്ടികയിൽ മൂന്നാം സ്ഥാനത്താണ്. കളിച്ച അഞ്ച് മത്സരങ്ങളിൽ മൂന്ന് വിജയം നേടിയ ഡൽഹി നാല് പോയിന്റുമായി എട്ടാം സ്ഥാനത്താണുള്ളത്.
Comments