മുംബൈ: ഐപിഎല്ലിൽ പഞ്ചാബ് കിംഗ്സിന് എതിരായ മത്സരത്തിൽ ഹൈദരാബാദിന് തകർപ്പൻ ജയം. പഞ്ചാബ് ഉയർത്തിയ 152 റൺസ് വിജയലക്ഷ്യം 18.5 ഓവറിൽ ഹൈദരാബാദ് മറികടന്നു. ഏഴ് വിക്കറ്റിനാണ് ഹൈദരാബാദിന്റെ വിജയം.
ടോസ് നഷ്ടപ്പെട്ട് ബാറ്റിംഗിന് ഇറങ്ങിയ പഞ്ചാബിന് എല്ലാവരുടെ വിക്കറ്റുകൾ നഷ്ടമായിരുന്നു. 20 ഓവറിൽ 151 റൺസ് മാത്രമാണ് പഞ്ചാബിന് നേടാനായത്. 60 റൺസെടുത്ത ലിയാം ലിവിംഗ്സറ്റണാണ് പഞ്ചാബിന്റെ ടോപ് സ്കോറർ. മികച്ച ഫോമിൽ കളിച്ച താരത്തിന്റെ വിക്കറ്റ് 18 ഓവറിന്റെ അവസാനത്തോടെ ഭുവനേശ്വർ കുമാർ നേടുകയായിരുന്നു.
ശിഖർ ധവാൻ (8), പ്രഭ്സിമ്രാൻ സിംഗ് (14), ജോണി ബെയർസ്റ്റോ (12), ജിതേഷ് ശർമ (11), ഷാറുഖ് ഖാൻ (26), ഒഡെയ്ൻ സ്മിത്ത് (13), രാഹുൽ ചാഹർ (0), വൈഭവ് അറോറ (0), അർഷ്ദീപ് സിംഗ് (0) എന്നിങ്ങനെയാണ് മറ്റുതാരങ്ങളുടെ സ്കോറുകൾ. ഉമ്രാൻ മാലിക്കിന്റെ പന്തുകളിൽ 4 വിക്കറ്റുകളാണ് പഞ്ചാബിന് നഷ്ടമായത്. ഉമ്രാന് പുറമെ ഭുവനേശ്വർ കുമാർ മൂന്ന് വിക്കറ്റെടുത്തു. ടി നടരാജൻ, ജഗദീഷ സുജിത് എന്നിവർ ഓരോ വിക്കറ്റ് വീതവും നേടി പഞ്ചാബിനെ പുറത്താക്കുകയായിരുന്നു.
മറുപടി ബാറ്റിംഗിനിറങ്ങിയ ഹൈദരാബാദിന് ഭേദപ്പെട്ട തുടക്കമാണ് ലഭിച്ചത്. എയ്ഡൻ മാർക്രമാണ് ഹൈദരാബാദിന്റെ ടോപ് സ്കോറർ. 27 പന്തിൽ നിന്നും നാല് ബൗണ്ടറികളും, ഒരു സിക്സറും അടിച്ചെടുത്ത എയ്ഡൻ മാർക്രം, 41 റൺസ് നേടി പുറത്താകാതെ നിന്നു. കളി ജയിക്കുമ്പോൾ, മാർക്രവും നിക്കോളാസ് പുരനുമായിരുന്നു ക്രീസിൽ. 30 പന്തിൽ നിന്നും ഒരു ബൗണ്ടറിയുടെയും ഒരു സിക്സറിന്റെയും അകമ്പടിയോടെ 35 റൺസാണ് നിക്കോളാസ് പുരൻ നേടിയത്.
അഭിഷേക് ശർമ്മ(31), കെയ്ൻ വില്യംസൺ(3), രാഹുൽ ത്രിപാഠി(34) എന്നിങ്ങനെയാണ് മറ്റ് താരങ്ങളുടെ സ്കോർ. രാഹുൽ ചാഹറാണ് ഹൈദരാബാദിന്റെ രണ്ട് വിക്കറ്റുകൾ വീഴ്ത്തിയത്. കഗിസോ റബാദ ഒരു വിക്കറ്റും നേടി. ഇതോടെ, ആറ് കളികൾ പൂർത്തിയാക്കിയ ഹൈദരാബാദ് എട്ട് പോയിന്റുകൾ നേടി പട്ടികയിൽ നാലാം സ്ഥാനത്താണ്. ഇന്നത്തെ കളിയിലെ പരാജയത്തോടെ ആറ് പോയിന്റുമായി പട്ടികയിൽ ഏഴാം സ്ഥാനത്താണ് പഞ്ചാബ്.
Comments