കൊരട്ടി: റോഡരികില് നിര്ത്തിയിട്ടിരുന്ന ട്രക്കുമായി മനോദൗര്ബല്യമുള്ള യുവാവ് പാഞ്ഞത് 27 കിലോമീറ്റര്. മുന് ട്രക്ക് ഡ്രൈവര് കൂടിയാണ് ഈ യുവാവ്. അപകടകരമായ രീതിയില് വാഹനം ഓടിച്ചതോടെ പലയിടത്തും പ്രശ്നങ്ങള് ഉണ്ടാവുകയും ചെയ്തു. ലോറി ഡ്രൈവര് ഈ സമയം വണ്ടിയുടെ കാബിനുള്ളില് കിടന്ന് ഉറങ്ങുകയായിരുന്നു. നാട്ടുകാര് ട്രക്ക് തടഞ്ഞു നിര്ത്തി ബഹളം വച്ചപ്പോള് മാത്രമാണ് കാബിനുള്ളില് കിടന്ന് ഉറങ്ങിയ ഡ്രൈവര് ഈ വിവരമെല്ലാം അറിയുന്നത്. ലോറി ഡ്രൈവര് നല്കിയ പരാതിയുടെ അടിസ്ഥാനത്തില് കൊരട്ടി പോലീസ് സ്ഥലത്തെത്തി ഇയാളെ പിടികൂടി.
മധ്യപ്രദേശ് സ്വദേശിയായ യുവാവാണ് അറസ്റ്റിലായത്. മണ്ണുത്തി-നെടുമ്പാശേരി ദേശീയപാതയില് ഇന്നലെ രാവിലെ 4.30ഓടെയായിരുന്നു സംഭവം. കര്ണാടകയില് നിന്ന് കൊച്ചിയിലേക്ക് സാധനങ്ങളുമായി വന്ന ട്രക്കായിരുന്നു ഇത്. പാലിയേക്കര ടോള് പ്ലാസയ്ക്ക് സമീപം വണ്ടി നിര്ത്തി ട്രക്കിന്റെ ഡ്രൈവര് ശുചിമുറിയില് പോയി. മറ്റൊരു ഡ്രൈവര് ഈ സമയം വണ്ടിയ്ക്കുള്ളില് കിടന്ന് ഉറങ്ങുകയായിരുന്നു. അതുകൊണ്ട് തന്നെ വാഹനം ഓടിച്ചിരുന്ന ഡ്രൈവര് വണ്ടിയില് നിന്ന് താക്കോല് എടുത്തതുമില്ല. ഈ സമയത്താണ് വഴിയരികില് നിന്ന യുവാവ് ട്രക്കുമായി കടന്നു കളഞ്ഞത്.
പലയിടത്തും ഇയാള് അപകടകരമായി വണ്ടി ഓടിക്കാന് തുടങ്ങിയതോടെയാണ് പൊങ്ങത്ത് വച്ച് ട്രക്ക് തടഞ്ഞത്. ബസ് ജീവനക്കാരുടെ നേതൃത്വത്തിലായിരുന്നു ഇയാളെ തടഞ്ഞത്. ഈ സമയം ബഹളം കേട്ടാണ് ട്രക്കിനുള്ളില് ഉറങ്ങി കിടക്കുകയായിരുന്ന ഡ്രൈവര് ഉണരുന്നത്. ഫോണ് കാബിനില് തന്നെ വച്ചതിനാല് ആദ്യത്തെ ഡ്രൈവര്ക്ക് ഇയാളെ വിവരങ്ങള് അറിയിക്കാനും സാധിച്ചിരുന്നില്ല. തുടര്ന്ന് പോലീസ് വാഹനം കസ്റ്റഡിയിലെടുത്തു. ലോറി ഡ്രൈവര്ക്ക് പരാതി ഇല്ലാത്തതിനാല് മധ്യപ്രദേശ് സ്വദേശിയായ യുവാവിനെ കോടതിയില് ഹാജരാക്കിയതിന് ശേഷം വിട്ടയച്ചു.
Comments