ഉയരം കൂടിപ്പോകുക എന്നത് സർവ്വസാധാരാണമാണ്. ചിലർക്ക് കുടുംബത്തിലെ മറ്റാരേക്കാളും ഉയരം വെയ്‌ക്കാറുണ്ട്. മറ്റ് ചിലർക്കാകട്ടെ ഉയരം കുറഞ്ഞ് പോകാറുമുണ്ട്. എന്നാൽ, ഉയര കൂടുതൽ കൊണ്ട് ഗിന്നസ് റെക്കോർഡ്സിൽ ഇടംപിടിച്ച ഒരു കുടുംബത്തെ കുറിച്ച് നിങ്ങൾ കേട്ടിട്ടുണ്ടോ? ഉയരത്തിന്റെ കാര്യത്തിൽ നമ്പർ വണായ ട്രാപ്പ് കുടുംബത്തെ കുറിച്ച് അറിയാം…
സ്‌കോട്ട് ട്രാപ്പും, ക്രിസ്സി ട്രാപ്പും മൂന്നു മക്കളും-കേക്കുമ്പോൾ വലിയ അത്ഭുതമൊന്നുമില്ല, സാധാരണ ഒരു കുടുംബം. എന്നാൽ ലോകത്തിലെ ഏറ്റവും ഉയരമുള്ള കുടുംബമാണ് ഈ അഞ്ചുപേർ അടങ്ങുന്നതെന്ന് പറഞ്ഞാൽ, അത്ഭുതം വാനോളമുയരും. മക്കളിൽ ആൺകുട്ടിയായ ആദം ട്രാപ്പിനാണ് കുടുംബത്തിൽ ഏറ്റവും കൂടുതൽ ഉയരം. 221.71 സെന്റിമീറ്ററാണ് ആദമിന്റെ പൊക്കം. അമ്മ ക്രിസ്സിയ്‌ക്കാണ് കൂട്ടത്തിൽ ഉയരം കുറവ്. 191.2 സെന്റിമീറ്ററാണ് ഇവരുടെ ഉയരം. ഉയരം കൂടിയ കുടുംബത്തിലെ ഉയരം കുറഞ്ഞ വ്യക്തി താനാണെന്നാണ് അമ്മ ക്രിസ്സി പറയുന്നത്.
ഗിന്നസ് ലോകറെക്കോർഡിന്റെ അറിയിപ്പ് പ്രകാരം ഈ അഞ്ചംഗ യുഎസ് കുടുംബമാണ് ലോകത്തിലെ ഏറ്റവും ഉയരമുള്ള കുടുംബമെന്ന ലോകറെക്കോർഡ് സ്വന്തമാക്കിയിരിക്കുന്നത്. 2020 ഡിസംബർ 6നാണ് ഇവരെ ആദ്യമായി ലോകത്തിലെ ഏറ്റവും ഉയരം കൂടിയ കുടുംബമായി ഗിന്നസ് വേൾഡ് റെക്കോർഡ് പ്രഖ്യാപിച്ചത്. കുടുംബത്തിന്റെ ശരാശരി ഉയരം 203.29 സെന്റിമീറ്ററാണ്. അതായത്, 6 അടി 8 ഇഞ്ച്.
പെൺമക്കളിൽ സവന്ന ട്രാപ്പ് ബ്ലാന്റ്ഫീൽഡിന് 203.6 സെന്റിമീറ്ററാണ് ഉയരം, മോളി സ്റ്റീഡിനാവട്ടെ 197.26 സെന്റിമീറ്ററും. പിതാവ് ട്രാപ്പ് പറയുന്നത് താൻ ഒന്നാം ക്ലാസിൽ പഠിക്കുമ്പോൾ തന്നെ ടീച്ചറേക്കാൾ ഉയരമുണ്ടായിരുന്നുവെന്നാണ്. സ്‌കോട്ട് ട്രാപ്പിന്റെയും ക്രിസ്സിയുടെയും മൂന്ന് മക്കളും സ്പോർട്സ് രംഗത്ത് സജീവമാണ്. സവന്ന ഡിവിഷൻ വൺ ബാസ്‌ക്കറ്റ് ബോൾ താരമാണ്. ആദയം ഹൈസ്‌കുൾ മുതൽ ബാസ്‌ക്കറ്റ് ബോൾ കളിക്കാരനായിരുന്നു.
ഉയരക്കാരായതിനാൽ, ഇവർ നേരിടുന്ന പ്രശ്നങ്ങളും ചില്ലറയല്ല. വസ്ത്രം വാങ്ങാൻ പോയാൽ കൃത്യമായ അളവിൽ കിട്ടില്ല. ഷൂസിന്റെ സ്ഥിതിയും ഇതുതന്നെ. മാത്രമല്ല, വാതിലുകളിലും, സീലിംഗ് ഫാനുകളിലും വിളക്കിലുമെല്ലാം തലമുട്ടുന്നതും സ്ഥിരം സംഭവമാണെന്നാണ് ഇവർ പറയുന്നത്. ഏത് ആൾക്കൂട്ടത്തിൽ പെട്ടാലും ഉയരത്തിലേയ്‌ക്ക് നോക്കുന്നവർക്ക് ഇവരെയെല്ലാം കാണാമെന്നതാണ് ഏറ്റവും രസകരമായ കാര്യം.
കഴിഞ്ഞ ദിവസം ഈ കുടുംബത്തിന്റെ വീഡിയോ ഗിന്നസ് റെക്കോർഡ് ഇൻസ്റ്റഗ്രാമിൽ പങ്കുവെച്ചിരുന്നു. ധാരാളം ആളുകളാണ് ഇവരുടെ വീഡിയോയ്‌ക്ക് രസകരമായ അഭിപ്രായങ്ങളുമായി രംഗത്തെത്തിയത്. സാധാരണ ഗതിയിൽ മക്കളുടെ കണ്ണ് വെട്ടിച്ച് അമ്മമാർ ഉയരമുള്ള സ്ഥലത്ത് സാധനങ്ങൾ ഒളിപ്പിച്ചിരുന്നത്. എന്നാൽ ഈ ട്രാപ്പ് കുടുംബത്തിലെ അമ്മ കട്ടിലിനടിയിലായിരിക്കും സാധനങ്ങൾ ഒളിപ്പിച്ചുവെയ്‌ക്കുന്നത് എന്നിങ്ങനെയാണ് ആളുകൾ അഭിപ്രായപ്പെടുന്നത്.
