നല്ല ചൂട് ഇഡ്ഡലി, തൂവെള്ള നിറത്തിലുള്ള തേങ്ങാ ചമ്മന്തി, കായത്തിന്റെ സ്വാദ് വിളിച്ചോതുന്ന സാമ്പർ…ആഹാ കേൾക്കുമ്പോൾ തന്നെ വായിൽ കപ്പലോടും. എന്നാൽ ഇതിനൊപ്പം അൽപം ഐസ്ക്രീം കൂടെ ആയാലോ? എന്ത്, ഐസ്ക്രീമോ അതും ഇഡ്ഡലിയ്ക്കൊപ്പമോ? അതെന്തൊരു കോമ്പിനേഷനാണ് എന്നോർത്ത് മൂക്കത്ത് വിരൽ വെയ്ക്കാൻ വരട്ടെ, അത്തരത്തിലൊരു വിഭവമാണ് സമൂഹമാദ്ധ്യമങ്ങളിൽ ഇപ്പോൾ വിമർശനങ്ങൾ ഏറ്റുവാങ്ങുന്നത്. ‘ദ ഗ്രേറ്റ് ഇന്ത്യൻ ഫുഡീ’ എന്ന ഇൻസ്റ്റഗ്രാം പേജാണ് ഐസ്ക്രീം ഇഡ്ഡലി എന്ന ഈ ‘മാരക’ ഫുഡ് ഐറ്റത്തെ പരിചയപ്പെടുത്തുന്നത്.
ആദ്യം നല്ല പതുപതുത്ത ഇഡ്ഡലി എടുക്കുന്നു, അതിന് മുകളിലേയ്ക്ക് രണ്ട് തരം ചമ്മന്തിയും സാമ്പാറും ഒഴിക്കുന്നു, ശേഷം ഒരു സ്കൂപ്പ് ഐസ്ക്രീം ചേർക്കുന്നു. പിന്നീട് ഇവ നന്നായി കൂട്ടിയോജിപ്പിച്ച്, റോളുകളാക്കി എടുക്കുന്നു. ഈ റോൾ ഒരു പാത്രത്തിലേയ്ക്ക് മാറ്റി, ഒരു പീസ് ഇഡ്ഡലിയ്ക്കും ചമ്മന്തിയ്ക്കും സാമ്പാറിനുമൊപ്പം കഴിക്കാൻ നൽകുന്നു. ഇതാണ് ഇൻസ്റ്റഗ്രമിൽ പങ്കുവെച്ച വീഡിയോയിൽ കാണാൻ സാധിക്കുന്നത്.
https://www.instagram.com/p/CcXibajpXbb/
സംഗതി വൈറലായതോടെ ഇഡ്ഡലിയ്ക്ക് നീതി ആവശ്യപ്പെട്ട് ധാരാളം ആളുകളാണ് രംഗത്തെത്തിയത്. ഇഡ്ഡലി എന്ന പരമ്പരാഗത വിഭവത്തെ നശിപ്പിച്ചല്ലോ എന്നും, ഇതുണ്ടാക്കിയ ആൾ മാപ്പ് അർഹിക്കുന്നില്ലെന്നുമാണ് ആളുകൾ അഭിപ്രായം പങ്കുവെയ്ക്കുന്നത്. ഇത്തരത്തിലുള്ള ദ്രോഹം ചെയ്യുന്നതിലൂടെ ഇതുണ്ടാക്കിയ ആൾക്ക് എന്ത് സന്തോഷമാണ് ലഭിക്കുന്നതെന്നും, സൗത്ത് ഇന്ത്യൻ ഭക്ഷണങ്ങളുടെ അന്തസ്സ് കളഞ്ഞല്ലോ എന്നും ആളുകൾ പറയുന്നു.
Comments