വിവാഹ ദിനം ഏതൊരാൾക്കും ഏറെ പ്രാധാന്യമേറിയതാണ്. രണ്ട് പേരോടൊപ്പം രണ്ട് കുടുംബങ്ങളും ഒന്നുചേരുന്ന ഈ ദിവസം വ്യത്യസ്തമാക്കാനാണ് എല്ലാവരും ശ്രമിക്കാറുള്ളത്. വിവാഹ ദിവസം ഇടുന്ന മേക്കപ്പ് മുതൽ വിവാഹ വേദിയിലെത്തുന്നത് എങ്ങനെയെന്ന് വരെ കൃത്യമായി ആലോചിച്ച് തീരുമാനിക്കുകയാണ് പതിവ്. വാദ്യോപകരണങ്ങളോടൊപ്പം നൃത്തം ചെയ്തും കുതിരപ്പുറത്ത് കയറിയും വധൂവരന്മാർ വേദിയിലെത്തുന്നതും നാം കാണാറുണ്ട്. കല്യാണത്തിന് ഹെലികോപ്റ്ററിൽ പറന്നിറങ്ങുന്നത് ഉൾപ്പെടെ ഇപ്പോഴൊരു ട്രെൻഡായി മാറിയിരിക്കുകയാണ്.
എന്നാൽ ഇതിൽ നിന്നെല്ലാം വ്യത്യസ്തമായി വിവാഹ വേദിയിലേക്ക് ബലൂണിൽ പറന്നിറങ്ങുന്ന വധുവിന്റെ വീഡിയോയാണ് ഇപ്പോൾ സൂഹമാദ്ധ്യമങ്ങളിൽ പ്രചരിക്കുന്നത്. റൊമാന്റിക് വിവാഹങ്ങൾക്ക് പേരുകേട്ട ഇറ്റലിയിലെ ഫ്ലോറൻസിലാണ് ഈ അത്ഭുത വിവാഹം നടന്നത്. 250 ഹീലിയം ബലൂണുകൾ ഒന്നിച്ച് കെട്ടി, പ്രത്യേകം ഇരിപ്പിടം ഉണ്ടാക്കി, അതിലിരുന്നാണ് വധു വിവാഹത്തിന് എത്തിയത്. ഓഫ് ഷോൾഡർ ഗൗൺ അണിഞ്ഞ് അതിസുന്ദരിയായി വധു വിവാഹ വേദിയിലേക്ക് പറന്നിറങ്ങി.
വെഡ്ഡിംഗ് കമ്പനിയുടെ പ്ലാനിംഗ് അനുസരിച്ചാണ് വധു വ്യത്യസ്തമായ രീതിയിൽ എത്തിയത്. ഈ വീഡിയോ പോസ്റ്റ് ചെയ്ത് നിമിഷങ്ങൾക്കം സമൂഹമാദ്ധ്യമങ്ങളിൽ വൈറലായി. ഇത്തരം വിവാഹ രീതികളെ പ്രശംസിച്ച് നിരവധി പേർ രംഗത്തെത്തിയിട്ടുണ്ട്.
