ഒരാൾ എന്നുമരിക്കുമെന്ന് മുൻകൂട്ടി പ്രവചിക്കാനാവുമോ? തീർത്തും അസാദ്ധ്യം എന്നല്ലേ പറയാൻ വന്നത്. എന്നാൽ, ഇക്കാര്യം അസാദ്ധ്യമല്ല എന്നാണ് ശാസ്ത്രജ്ഞർ പറയുന്നത്. നിർമ്മിത ബുദ്ധി, കൃത്രിമ ബുദ്ധി അഥവാ ആർട്ടിഫിഷ്യൽ ഇന്റലിജൻസ് ഉപയോഗിച്ച് എപ്പോൾ മരിക്കുമെന്ന് കണ്ടെത്തുന്നതിനുള്ള പരീക്ഷണത്തിലാണ് ഗവേഷകർ. പെൻസിൽവാനിയയിലെ ജെയ്‌സിഞ്ചർ ഹെൽത്ത് സിസ്റ്റത്തിലെ ഗവേഷകർ ഇത്തരമൊരു നിർമ്മിതബുദ്ധി കണ്ടുപിടിച്ചിരുന്നു. ഇസിജി ഫലങ്ങൾ പരിശോധിച്ച് താരതമ്യപ്പെടുത്തിയാണ് മരണം അടുത്തോ എന്ന് നിർമ്മിത ബുദ്ധി പ്രവചിക്കുന്നത്.
ഇസിജി സിഗ്നലുകൾ നേരിട്ട് വിശകലനം ചെയ്യാനോ സാധാരണ ഇസിജി റിപ്പോർട്ടുകൾ തന്നെ താരതമ്യപ്പെടുത്താനോ ആർട്ടിഫിഷ്യൽ ഇന്റലിജൻസിന് സാധിക്കും. ഒരു വർഷത്തിനുള്ളിൽ രോഗി മരിക്കാനുള്ള സാധ്യത എത്രത്തോളമുണ്ടെന്നായിരിക്കും ഈ നിർമ്മിത ബുദ്ധി പ്രവചിക്കുക. പല ഡോക്ടർമാരും പ്രത്യേകിച്ച് കുഴപ്പമൊന്നുമില്ലെന്ന് വിലയിരുത്തിയ രോഗികളുടെ പോലും മരണം കൃത്യമായി പ്രവചിക്കാൻ ഈ നിർമിത ബുദ്ധിക്കായി എന്നതും ശ്രദ്ധേയമാണ്. മൂന്ന് ഹൃദ്രോഗവിദഗ്ധർ പരിശോധിച്ചിട്ടും കുഴപ്പം കണ്ടെത്താനാവാത്ത ഇസിജിയാണ് നിർമിത ബുദ്ധി കണ്ട് മരണം പ്രവചിച്ചത്.
നാല് ലക്ഷത്തോളം രോഗികളുടെ 17.7 ലക്ഷം ഇസിജി ഫലങ്ങളാണ് സംഘം വിശകലനം ചെയ്തത്. ഇതേ സംഘം തന്നെ നടത്തിയ മറ്റൊരു പഠനത്തിൽ ഭാവിയിൽ ഹൃദയമിടിപ്പിന്റെ താളം തെറ്റാൻ സാധ്യതയുള്ള രോഗികളേയും നിർമിത ബുദ്ധികൊണ്ട് കണ്ടെത്താനാകുമെന്ന് കണ്ടു. രണ്ട് പഠനങ്ങൾക്കുമായി പെൻസിൽവാനിയയിലെ ജെയ്‌സിഞ്ചർ ഹെൽത്ത് സിസ്റ്റത്തിൽ സൂക്ഷിച്ചിരുന്ന ഇരുപത് ലക്ഷത്തോളം ഇസിജി റിപ്പോർട്ടുകളാണ് ഇതിനായി ഉപയോഗിച്ചത്. ഡോക്ടർമാർക്കൊപ്പം കംപ്യൂട്ടറുകൾക്കും രോഗനിർണ്ണയത്തിലും മറ്റും ചെറുതല്ലാത്ത പങ്ക് ഭാവിയിൽ ഉണ്ടാകുമെന്നതിന്റെ സൂചനയാണ് ഈ കണ്ടെത്തൽ.
അതേസമയം രാജ്യാന്തര തലത്തിൽ ഇന്നു ഏറ്റവും കൂടുതൽ കേൾക്കുന്ന വിഷയമാണ് നിർമ്മിത ബുദ്ധി എന്നത്. മനുഷ്യരുടേത് പോലെ ചിന്തിക്കാനും തീരുമാനമെടുക്കാനുമുള്ള കഴിവുകൾ കമ്പ്യൂട്ടറുകളിലേയ്‌ക്കും മെഷീനുകളിലേയ്‌ക്കും പകർത്തുന്നതിനാണ് എഐ ഉപയോഗിക്കുന്നത്. ആഗോളതലത്തിൽ ആർട്ടിഫിഷ്യൽ ഇന്റലിജൻസ് രംഗത്ത് ഇന്ത്യ ആറാം സ്ഥാനത്താണ്.
നാളത്തെ ലോകം നിയന്ത്രിക്കുന്നത് ‘നിർമിത ബുദ്ധി’ ആയിരിക്കുമെന്ന് മുൻകൂട്ടി കണ്ട് 2019ലെ കേന്ദ്ര ബജറ്റിലും ആർട്ടിഫിഷ്യൽ ഇന്റലിജൻസ് ഉൾപ്പെടുത്തി. രാജ്യത്ത് ആർട്ടിഫിഷ്യൽ ഇന്റലിജൻസ് പ്രോഗ്രാമിന് വേണ്ടി ദേശീയ സെന്റർ തന്നെ തുടങ്ങാനാണ് പദ്ധതി. ഇതിനായി ഒരു പോർട്ടലും സ്ഥാപിച്ചു. മുന്നിലുള്ള രാജ്യങ്ങൾ ‘നിർമ്മിത ബുദ്ധി’ മേഖലയിൽ വൻ പദ്ധതികളാണ് ആസൂത്രണം ചെയ്യുന്നത്.
